وسیلہ ویلفیئر فاؤنڈیشن دینہ کے سیلاب زدگان کیلئے لگائے گئے خدمت انسانیت دستر خوان کا ایک ماہ مکمل

دینہ: پاکستان اس وقت تاریخی سیلابی تباہی کا شکار ہے لاکھوں لوگ بے گھر اور کھلے آسمان تلے مدد کے منتظر ہیں۔ سینکڑوں خواتین، بچے، بوڑھے سیلاب میں بہہ گئے ہیں، ماؤں کے سامنے ان کے بچوں کو سیلاب کی بے رحم لہریں اپنے ساتھ بہا کر لے گئیں۔

وسیلہ ویلفیئر فاؤنڈیشن جہلم کی ٹیم پچھلے ایک مہینے سے تونسہ شریف میں موجود ہے اور اہلیان ضلع جہلم کی طرف سے دکھی دل اور نیک جذبات کے ساتھ، خشک راشن، نقدی، کپڑے، ادویات، پکا ہوا کھانا مصیبت زدہ مخلوق انسانیت تک پہنچا رہے ہیں، اس کے ساتھ ساتھ سیلاب سے مکمل تباہ شدہ بستیوں چھتانی،جت والا اور منگروٹھہ میں ”خدمت انسانیت دستر خوان” کے ذریعے روزانہ سینکڑوں مرد و خواتین،بچے اور بچیوں کو انتہائی عزت اور احترام سے بٹھا کر کھانا کھلایا جا رہا ہے۔

سیلابی آفت کا شکار ان بستیوں کی ضروریات کو مدنظر رکھتے ہوئے ”فری میڈیکل کیمپ” کا بھی آغاز کیا گیا ہے جہاں مفت چیک اپ اور مفت ادویات مہیا کی جا رہی ہیں۔

خدمت انسانیت دستر خوان کا ایک مہینہ مکمل ہونے کی خصوصی دعائیہ محفل سے خطاب کرتے ہوئے سلیم انور کسانہ چیئرمین وسیلہ ویلفیئر فاؤنڈیشن جہلم نے کہا کہ یہ امتحان کی گھڑی نہ صرف سیلابی پانی میں گھری دکھی انسانیت کے لیے ہے بلکہ یہ ان لوگوں کے لئے بھی امتحان ہے جو اپنے گھروں میں محفوظ ہیں اور اپنے رب کی دی ہوئی نعمتوں سے مستفید ہو رہے ہیں۔

انہوں نے اس موقع پر ایک اور بستی ”سوکڑ تونسہ شریف” میں بھی خدمت انسانیت دستر خوان شروع کرنے کا اعلان کیا۔ اہلیان تونسہ شریف نے دکھ کی اس گھڑی میں بروقت امداد پہنچانے پر وسیلہ ویلفیئر فاؤنڈیشن بالخصوص ضلع جہلم کی عوام کا شکریہ ادا کیا ہے۔