ڈسٹرکٹ کوارڈینیشن کمیٹی جہلم کا اجلاس، فواد چوہدری نے ترقیاتی منصوبوں پر پیش رفت کا جائزہ لیا
جہلم: سابق وفاقی وزیر اطلاعات فواد چوہدری کی زیر صدارت ضلع جہلم میں جاری ترقیاتی منصوبوں پر پیش رفت کا جائزہ لینے کے لیے ڈسٹرکٹ کوارڈینیشن کمیٹی کا اجلاس منعقد ہوا
اجلاس میں ممبر صوبائی اسمبلی راجہ یاور کمال، چوہدری ظفر اقبال، ڈپٹی کمشنر جہلم نعمان حفیظ، ڈی پی او ڈاکٹر فہد احمد، پی ٹی آئی رہنما چوہدری فراز، ایڈیشنل ڈپٹی کمشنر ریونیو بابر صاحب دین، ڈپٹی ڈائریکٹر ڈویلپمنٹ، سی ای او ہیلتھ، سی ای او ایجوکیشن سمیت دیگر متعلقہ محکموں کے افسران نے بھی شرکت کی۔
اجلاس میں ضلع جہلم میں جاری میگا پراجیکٹس، للِہ تا جہلم دیول کیرج وے، جلالپور ایریگیشن، ٹوبہ اور ڈی ایچ کیو ٹراما سنٹر کے قیام، لا اینڈ آرڈر کی صورتحال، شجرکاری مہم، قلعہ نندنہ کی تزئین و آرائش سمیت سالانہ ترقیاتی پروگرام، لوکل گورنمنٹ اور پبلک ہیلتھ انجینئرنگ کی سکیموں پر اب تک ہونے والی پیش رفت کا جائزہ لیا گیا۔
فواد چوہدری نے للِہ تا جہلم ڈیول کیرج وے پر جاری کام کی رفتار کو تیز کرنے کی ہدایت کی اور ایف ڈبلیو کی جانب سے کام کی سست روی پر عدم اطمینان کا اظہار کیا اور چیف منسٹر آفس انسپکشن ٹیم کو کام کی انکوائری کرنے کے لیے لیٹر لکھنے کی بھی ہدایت جاری کی، انہوں نے آئیسکو حکام کو ہدایت کی سڑک کی تعمیر میں رکاوٹ بننے والے بجلی کے کھمبوں کو 20 دن کے اندر ہٹایا جائے۔
چوہدری فواد نے تمام ترقیاتی کاموں کا تفصیلی جائزہ لیا اور متعلقہ ایکسین سے کام ہدف کے مطابق مکمل کروانے اور معیار پر ہرگز نا سمجھوتہ کرنے کی ہدایت کی۔
چوہدری فواد نے ضلع میں جاری ترقیاتی منصوبوں میں اعلیٰ کوالٹی میٹریل کا استعمال یقینی بنانے اور ساتھ ہی ساتھ انہوں نے متعلقہ ایکسینز کو اہداف کے مطابق کام کرنے کی ہدایت کی۔ بعد ازاں چوہدری فواد نے ڈپٹی کمشنر آفس کے احاطہ میں شجرکاری مہم کے تحت پودا لگایا اور دعا کی۔