وسیلہ ویلفیئر فاؤنڈیشن نے سیلاب زدگان کیلئے تونسہ میں ”خدمت انسانیت دستر خوان” کا آغاز کر دیا
دینہ: وسیلہ ویلفیئر فاؤنڈیشن نے سیلاب زدگان کے لئے بستی چھتانی تونسہ شریف ضلع ڈیرہ غازی خان میں ”خدمت انسانیت دستر خوان” کا آغاز کر دیا۔
تفصیلات کے مطابق ملک پاکستان اس وقت تاریخ کے بدترین سیلاب کا شکار ہے لاکھوں لوگ بے گھر اور کھلے آسمان تلے مدد کے منتظر ہیں۔ سینکڑوں خواتین، بچے، بوڑھے سیلاب میں بہہ گئے ہیں ماؤں کے سامنے ان کے بچوں کو سیلاب کی بے رحم لہریں اپنے ساتھ بہا کر لے گئیں۔
وسیلہ ویلفیئر فاؤنڈیشن جہلم کی ٹیم پچھلے ایک ہفتے سے تونسہ شریف میں موجود ہے اور اہلیان جہلم کی طرف سے دکھی دل کے ساتھ نیک جذبات، راشن اور نقدی مصیبت زدہ مخلوق انسانیت تک پہنچائے ہیں، اس کے ساتھ ساتھ سیلاب سے مکمل تباہ شدہ بستی چھتانی تونسہ شریف میں ”خدمت انسانیت دستر خوان” کا بھی آغاز کر دیا ہے جس میں اہلیان بستی کو انتہائی عزت اور احترام کے ساتھ روزانہ کھانا کھلایا جا رہا ہے۔
بستی کی ضروریات کو مدنظر رکھتے ہوئے ”فری میڈیکل کیمپ” کا بھی آغاز کیا گیا ہے جہاں مفت چیک اپ اور مفت ادویات مہیا کی گئی ہیں۔
اہلیان دیہہ نے دکھ کی اس گھڑی میں بروقت امداد پہنچانے پر وسیلہ ویلفئیر فاؤنڈیشن بالخصوص ضلع جہلم کی عوام کا شکریہ ادا کیا ہے۔