منگلا (اے پی پی + رضوان سیٹھی) وزیراعظم شہباز شریف نے پیر کو منگلا بجلی گھر کے یونٹ 5 اور 6 کے ریفربشمنٹ منصوبے کا افتتاح کر دیا۔ وزیراعظم آفس کے میڈیا ونگ سے جاری بیان کے مطابق منگلا بجلی گھر کی ریفربشمنٹ کے منصوبے کے تحت تمام یونٹ میں 50 برس پرانی مشینری کو تبدیل کرکے نئی مشینری لگائی جا رہی ہے۔
ریفربشمنٹ منصوبے کی مکمل تکمیل کے بعد منگلا بجلی گھر کی استعداد 1000 میگاواٹ سے بڑھ کر 1310 میگاواٹ ہو جائے گی جس کے نتیجے میں سالانہ 5 اعشاریہ 6 بلین یونٹ صاف، ماحول دوست اور کم لاگت بجلی پیدا کی جائے گی۔ منصوبے کے پہلے مرحلے یعنی 10 میں سے 6 یونٹس کی ریفربشمنٹ پر تقریباً 90 فیصد کام مکمل ہے۔
پیر کو وزیراعظم نے یونٹ نمبر 5 اور 6 کی تکمیل کا افتتاح کیا۔ مجموعی طور پر 483 ملین ڈالر کی لاگت سے جاری اس منصوبے میں یو ایس ایڈ کی طرف سے 150 ملین ڈالر کی گرانٹ، 90 ملین یورو کا اے ایف ڈی لون اور واپڈا کی طرف سے 178 ملین ڈالر فراہم کئے جا رہے ہیں۔
اس موقع پر معاون خصوصی طارق فاطمی، وزیراعظم آزاد کشمیر سردار تنویر الیاس، چیئر مین واپڈا لیفٹیننٹ جنرل (ر) سجاد غنی، امریکہ کے پاکستان میں سفیر ڈونلڈ بلوم، یو ایس ایڈ مشن ڈائریکٹر ریڈ ایسچلیمین (Reed Aeschliman) بھی موجود تھے۔