واٹر سپلائی پائپوں میں سیوریج کا گندہ پانی شامل، شہری بدبودار اور مضر صحت پانی استعمال کرنے پر مجبور
جہلم: شہر اور گردونواح کے علاقوں کے واٹر سپلائی پائپوں میں سیوریج کا گندہ پانی شامل، علاقہ مکین بدبودار اور مضر صحت پانی استعمال کرنے پر مجبور، متبادل انتظام نہ ہونے کی وجہ سے شہری بیماریوں میں مبتلا ہونے لگے، شہریوں نے منتخب ممبران سے نئی پائپ لائنیں بچھانے کا مطالبہ کر دیا۔
تفصیلات کے مطابق شہر وگردونواح میں 80 کی دہائی میں زیر زمین بچھائی جانے والی واٹر سپلائی اور سیوریج کی لائنیں ٹوٹ پھوٹ کا شکار ہونے کی وجہ سے شہریوں کے گھروں میں سپلائی ہونے والا پانی بھی بدبو دار ناقص و غیر معیاری ہے۔ مین سیوریج لائنیں بند ہونے کے باعث نالیوں کا پانی گلیوں میں کھڑا رہتا ہے۔
کئی کئی ہفتے گزرنے کے باوجود بھی واٹر سپلائی کی لائینوں کی مرمت نہیں کی جا تی جبکہ سیوریج لائنوں کی لیکج کی وجہ سے شہریوں کو شدید مشکلات کا سامنا کرنا پڑ رہا ہے، متعدد گھروں میں معصوم بچے آلودہ پانی کے استعمال کرنے سے پیٹ کی بیماریوں اور نہانے سے خارش جیسی بیماریوں میں مبتلا ہو رہے ہیں۔
شہریوں نے وزیراعلیٰ پنجاب، چیف سیکرٹری پنجاب، سیکرٹری بلدیات سے نوٹس لینے کا مطالبہ کیا ہے۔