جہلم: اشیائے خوردونوش کی قیمتوں میں غیر معمولی اضافے کا سلسلہ نہ تھم سکا۔ شہر کے بازاروں میں ایک ماہ کے دوران درجہ اول اور دوم آئل کی قیمت میں بالترتیب 71 روپے سے 102 روپے تک اضافہ ریکارڈ کیا گیا، سرکاری جاری ہونے والی ریٹ لسٹ کے مطابق چاول، دالوں اور بیسن کی قیمتوں میں بھی 25 روپے سے 75 روپے تک اضافہ کر دیا گیا۔
تفصیلات کے مطابق شہر کے بازاروں میں گھی اور آئل کی مختلف قیمتیں وصول کی جارہی ہیں درجہ اول آئل کی فی لیٹر قیمت 600 سے 610 روپے تک پہنچ گئی ہے۔ ایک ماہ کے دوران درجہ اول آئل کی قیمت میں 71 روپے تک کا اضافہ ہو چکا ہے جس سے پانچ لیٹر کی آئل کی پیٹی 355 روپے اضافے سے 3050 روپے تک چلی گئی ہے جبکہ درجہ اول گھی کی قیمتوں میں بھی اسی تناسب سے اضافہ دیکھا گیا ہے۔
درجہ دوم آئل کی قیمتوں میں ایک ماہ کے دوران 102 روپے تک کا اضافہ ہوا جس سے 12 لیٹر کی پیٹی کی قیمت 1238 روپے اضافے سے 6528 روپے تک پہنچ گئی ہے جبکہ درجہ دوم گھی کی قیمت میں 71 روپے تک کا اضافہ کیا گیا ہے جس سے 12 کلو کی پیٹی 1132 روپے اضافے سے 6432 روپے تک جاپہنچی ہے۔
رواں ماہ ضلعی انتظامیہ کی طرف سے جاری کردہ سرکاری لسٹ میں دالوں کی قیمتوں میں بھی 75 روپے کلو تک کا اضافہ کیا گیا تھا۔
ریٹ لسٹ کے مطابق چاول باسمتی 45 روپے اضافے سے 300 روپے، دال چنا باریک 30 روپے اضافے سے 235 روپے، دال چنا 5 روپے اضافے سے 250 روپے، دال مسور موٹی 25 روپے اضافے سے 255 روپے، دال ماش امپورٹڈ دھلی ہوئی 75 روپے اضافے سے 410 روپے فی کلو مقرر کیا گیا ہے۔
دال ماش چھلکے والی امپورٹڈ 55 روپے اضافے سے 307، دال مونگ 30 روپے اضافے سے 255، کالا چنا موٹا لوکل 35 روپے اضافے سے 235 ، کالا چنا بار یک لوکل 35 روپے اضافے سے 220 روپے، سفید چنا 75 روپے اضافے سے 360 روپے جبکہ بیسن 40 روپے اضافے سے 255 روپے فی کلو مقرر کیا گیا ہے۔
دالوں کی ضروریات زیادہ تر در آمدات سے پوری کی جاتی ہے اور ایل سیز نہ کھلنے کی وجہ سے دالوں کی قیمتوں میں مزید اضافے کا امکان ہے۔