حکومت صحافیوں کی فلاح و بہبود کیلئے عملی اقدامات اٹھائے۔ شہباز بٹ، چوہدری عابد محمود
جہلم: حکومت صحافیوں کی فلاح و بہبود کیلئے عملی اقدامات اٹھائے، صحافیوں کو رہائشگاہوں کے لئے ضلعی اور تحصیل سطح پر صحافی کالونیاں، علاج معالجہ کیلئے صحت کارڈاور صحافیوں کے بچوں کی تعلیم مفت کرنے کا اعلان کرے، صحافی دن رات گرمی، سردی اور بارش طوفان میں شہریوں کے حقوق اور عوامی مسائل کو اجاگر کرنے کے لئے جدوجہد کرتے دکھائی دیتے ہیں۔
ان خیالات کا اظہار جہلم پریس کلب کے صدر محمد شہباز بٹ اور صدر الیکٹرانک میڈیا چوہدری عابد محمود نے تحصیل دینہ سے آئے ہوئے صحافیوں کے وفد سے خصوصی گفتگو کرتے ہوئے کیا۔ انہوں نے کہا کہ ضلع جہلم کے درجنوں صحافی رہائش، صحت اور تعلیم جیسی سہولتوں سے محروم چلے آ رہے ہیں جس کے باعث صحافی اور ان کے خاندان کے افراد کسمپرسی کی زندگیاں بسر کرنے پر مجبور ہیں، حکمرانوں کو صحافیوں کے مسائل حل کرنے کے لئے عملی اقدامات اٹھانا ہوں گے۔
انہوں نے کہا کہ حکمران ضلعی اور تحصیل سطح پر موجود صحافیوں کی کالونیوں اور دیگر سہولیات کا اعلان کریں اور اس پر عملدرآمد کروائیں جبکہ تحصیل سطح پر صحافیوں کو پریس کلبز کے لئے سرکاری عمارتیں الاٹ کریں تاکہ تحصیلوں کے صحافی علاقائی فلاح و بہبود کے لئے ایک مقام پر بیٹھ کر فرائض منصبی انجام دے سکیں، صحافیوں کے حقوق کیلئے کام کرنا ہماری اولین ترجیحات میں شامل ہے۔
چوہدری عابد محمود نے کہا کہ وفاقی حکومت سرکاری و نجی تعلیمی اداروں میں صحافیوں کے بچوں کے لئے مفت تعلیم سرکاری محکموں میں صحافیوں کے بچوں کے لئے الگ کوٹہ مختص کرے تاکہ صحافی اپنے بچوں کو اعلیٰ تعلیم دلوانے کے بعد سرکاری اداروں میں ملازمت اختیار کر سکیں۔