جہلم کے ہوٹلز مالکان کھانے کی اشیاء میں انتہائی ناقص اور بدبوردار گھی کا سر عام استعمال کرنے لگے

جہلم: شہر اور گردونواح میں ہوٹلوں اور خوانچہ فروشوں کا کھانوں میں ناقص وغیر میعاری ،گھٹیا اور بدبو دار گھی کا استعمال ، کھلی فضا ء میں موجود باورچی خانوں میں گندگی کے ڈھیر ، شہری ناقص و غیر معیار ی کھانے استعمال کرنے سے بیمار ہونے لگے ، پنجاب فوڈ اتھارٹی کے ذمہ د اران نے خاموشی اختیار کر لی۔

تفصیلات کے مطابق شہر سمیت جی ٹی روڈ پر قائم ہوٹلز مالکان کھانے کی اشیاء میں انتہائی ناقص اور بدبوردار گھی کا سر عام استعمال کر رہے ہیں جبکہ لاری اڈہ، سول ہسپتال ، ریلوے اسٹیشن و غیرہ پر گھی سے تلی اشیاء فروخت کرنے والے ان سے بھی 2 قدم آگے ہیں او ر ان کی مصنوعات میں سڑک پر سے اڑنے والا گردو غبار بھی شامل ہوتا ہے۔

ہوٹلوں کے باورچی خانے غسل خانوں، لیٹرینوں کے ساتھ بنائے گئے ہیں جو صفائی نہ ہونے کی وجہ سے گندگی سے اٹے ہوئے ہوتے ہیں اور کھانوں کی تیاری سے لیکر برتنوں کی دھلائی تک کے سارے عمل میں صفائی یا حفظان صحت کے اصولوں کا کوئی خیال نہیں رکھا جاتا جبکہ دوسری طرف پنجاب فوڈ اتھارٹی کے ذمہ داران ہوٹل مالکان سے باز پرس کرنے کی بجائے فوٹو سیشن کو ترجیح دیتے دکھائی دیتے ہیں۔

ذرائع کا یہ بھی کہنا ہے کہ پنجاب فوڈ اتھارٹی کے ذمہ داران ہوٹلوں ، بیکریوں، پکوڑے سموسے تیار کرنے والے مالکان کو چیک کرنے کی بجائے فرضی کارروائیاں کرکے افسران کو مطمئن کر دیتے ہیں ، جس کی وجہ سے شہری انتڑیوں اور پیٹ کی بیماریوں سمیت ہیپاٹائٹس جیسے مہلک امراض کا شکار ہو رہے ہیں۔

عوامی حلقوں نے ڈی جی پنجاب فوڈ اتھارٹی سے نوٹس لینے کا مطالبہ کیا ہے۔