جہلم میں مضر صحت برف کے گولے، قلفیاں اور جوسز کی فروخت، ہسپتالوں کی رونقیں بڑھنے لگیں

جہلم: شہر اور گردونواح میں مضر صحت برف کے گولے، قلفیاں اور جوسز کی فروخت شروع، ہسپتالوں کی رونقیں بڑھنے لگیں، پنجاب فوڈاتھارٹی کے ذمہ داران کی کارکردگی سوالیہ نشان ہے۔

تفصیلات کے مطابق جہلم شہر اور گردونواح میں مختلف چوک چوراہوں، مضافاتی علاقوں کے سکولوں اورسڑکوں کے اطراف میں قلفیاں اور برف گولے فروخت کرنے والے افراد نے سکرین اور مضر صحت شربت سے تیار کردہ برف کے گولے، قلفیوں کی فروخت دیدہ دلیری سے شروع کر رکھی ہے۔

اکثر علاقوں میںبرف گولے فروش تشہیر کے لئے لاؤڈ سپیکر استعمال کر تے دکھائی دیتے ہیں، گولے فروش سکرین اور مضر صحت کیمیکل ملا رنگ استعمال کرکے چھوٹے چھوٹے معصوم بچوں میں بیماریاں بانٹنے کا کام کر رہے ہیں۔ جس کے نتیجہ میں کمسن بچے مختلف مہلک امراض جن میں گیسٹرو، ہیپاٹائٹس، معدے سمیت دیگر موذی بیماریوں کا شکار ہو کر ہسپتالوں کا رخ کر رہے ہیں۔

رہی سہی کسر جعلی جوس اور ملٹی نیشنل کمپنیوں کے ناموں سے ملتے جلتے ناموں پر بننے والے جعلی دو نمبر مشروبات، جوسز آئس کریم اور قلفیوں نے پوری کر رکھی ہے، جو گلی محلوں سمیت بڑی بڑی دکانوں پر فروخت کئے جا رہے ہیں، دکاندار راتوں رات کروڑ پتی بننے کے خواب پورے کرنے کے چکروں میں شہریوں اور معصوم بچوں میں زہرفروخت کررہے ہیں، جن کے استعمال سے بچوں سمیت، خواتین، نوجوان لڑکیاں اور بوڑھوں میں مختلف بیماریاں پھیل رہی ہیں۔

پنجاب فوڈ اتھارٹی کے ذمہ داران نے اپنی آنکھوں پر پٹی باندھ رکھی ہے اور سادہ لوح افراد کو برف کے گولے اور جوس فروشوں کے رحم و کرم پر چھوڑ رکھا ہے۔ شہریوں نے ڈی جی پنجاب فوڈ اتھارٹی سے نوٹس لینے کا مطالبہ کیا ہے۔