جہلم: شہر سمیت ضلع بھر میں پٹرول پمپس مالکان نے پٹرول کی قلت پیدا کر دی، شہری شدید ذہنی تناؤ کا شکار، بعض پٹرول پمپس مالکان ایک خاص مقدار میں شہریوں کو پٹرول دینے لگے، پٹرول پمپس پر قطاریں لگ گئیں۔
گزشتہ روز شہر سمیت ضلع بھر میں قائم پٹرول پمپوں پر پٹرول کی قلت اور کم پٹرول دینے سے شہریوں میں خوف و ہراس پھیل گیا، شہری پریشانی سے دوچار ہو کر پٹرول پمپوں کے باہر قطاروں میں کھڑے ہو کر ایک دوسرے کو سوالیہ نظروں سے دیکھتے رہے۔
پٹرول پمپس مالکان شہریوں کو 2 سو سے 3 سو تک کا پٹرول ڈال کر دیتے رہے جس سے شہری ذہنی تذبذب کا شکار ہو گئے، متعدد پٹرول پمپس مالکان نے تو پٹرول کی سپلائی ہی بند کر دی۔
شہریوں نے اعلی حکام سے مطالبہ کیا ہے کہ پٹرول کی مصنوعی قلت پیدا کرنے اور خوف ہراس کی کیفیت پیدا کرنے والے پٹرول پمپس مالکان کے خلاف قانونی کارروائیاں کی جائیں پٹرول پمپس سیل کئے جائیں اور مالکان کے خلاف فوجداری مقدمات درج کروائے جائیں تاکہ بے چینی کی کیفیت کا خاتمہ ممکن ہو سکے۔