دینہ میں جی ٹی روڈ پر دن دیہاڑے نوسربازوں نے جعلی اینٹی نارکوٹکس کے ملازم بن کر گاڑی کو روک لیا اور 7 لاکھ کی نقدی چھین کر فرار ہو گئے، متاثرہ شخص راولپنڈی میں پلاسٹک کا سامان سپلائی کر کے واپس ملکوال جا رہا تھا کہ نوسربازوں نے لوٹ لیا، اطلاع ملتے ہی ایس ایچ او تھانہ دینہ بھاری نفری کے ہمراہ پہنچ گئے اور مقدمہ درج کر کے نوسربازوں کی تلاش شروع کر دی۔
تفصیلات کے مطابق غلام عباس عطاری ولد محمد نذیر سکنہ محلہ اسلام پورہ موڑ تحصیل بھیرہ سرگودھا نے پولیس تھانہ دینہ کو مقدمہ درج کرواتے ہوئے بتایا کہ میں سٹار پلاسٹک فیکٹری ملکوال کا پلاسٹک کا سامان برش وائپر وغیرہ گاری نمبری LZR-1336 شہزور پر راولپنڈی وغیرہ میں سپلائی کرتا ہوں۔
غلام عباس نے بتایا کہ گاڑی پر مال راولپنڈی دے کر ہمراہ ڈرائیور قیصر اقبال ولد بشیر احمد کے ہمراہ واپس ملکوال جا رہے تھے کہ دن ساڑھے 4 بجے کے قریب رورل ہیلتھ سنٹر دینہ کے مقام پر پہنچا تو پیچھے سے ایک کار برنگ سفید کرولا جس کو کالے رنگ کی نمبر پلیٹ لگی ہوئی تھی جس کے نمبر 447 پڑھا جا سکا ہے جس میں 2 اشخاص سوار تھے۔
متاثرہ شخص نے بتایا کہ ایک شخص کے ہاتھ میں میٹرولا وائرلیس سیٹ تھا اشارہ دے کر ہمیں روک لیا اور اپنا تعارف اینٹی نارکوٹکس ملازمین کا کروایا اور ہماری تلاشی لینی شروع کر دی۔
غلام عباس نے بتایا کہ نوسربازوں نے گاڑی میں پڑا ہوا بیگ جس میں 7 لاکھ روپے کی نقدی تھی تلاشی کے بہانے لیا اور اپنی کار میں بیٹھ گئے، مجھے شک گزرا تو میں نے بیگ واپس لینے کی کوشش کی لیکن یکدم بیگ چین کر گاڑی لے کر بھاگ گئے جب میرے اور ان کے درمیان بیگ پر کشمکش ہوئی تو دیکھا ان کے پاس گاڑی میں پستول بھی تھا۔
واردات کے بعد اطلاع ملتے ہی ایس ایچ او تھانہ دینہ محمد عمران اپنی بھاری نفری کے ہمراہ پہنچ گئے اور متاثر ہ شخص غلام عباس کی درخواست پر مقدمہ درج کر کے نوسربازوں کی تلا ش شروع کر دی۔
