ذہنی دباؤ روزمرہ زندگی میں مختلف معاملات اور پہلوؤں پر ہمارا ذہنی یا جسمانی ردعمل ہے۔ حسن خالد
جہلم: ڈسٹرکٹ پاپولیشن ویلفیئر آفس جہلم نے فلاحی مراکز کی انچارجز، فیملی ویلفیئر اسسٹنٹ مرد / خواتین اور سوشل موبلائزر کیلئے کام کے دوران ذہنی دباؤ اور اس سے بچاؤ کے لیے آگاہی سیشنز کا انعقاد کیا۔
حسن خالد وڑائچ ڈسٹرکٹ پاپولیشن ویلفیئر آفیسر جہلم نے ان سیشنز کے انعقاد کے دوران ذہنی دباؤ، اس کے عوامل اور علامات، ذہنی دباؤ کی اقسام اور کام کے دوران ذہنی تناؤ سے بچنے اور تدارک پر گفتگو کرتے ہوئے شرکاء کو بتایا کہ ذہنی دباؤ ہماری روزمرہ کی زندگی میں مختلف معاملات اور پہلوؤں پر ہمارا ذہنی یا جسمانی ردعمل ہے۔
انہوں نے بتایا کہ ذہنی تناؤ کی علامات میں عام طور پر بے چینی، کپکپی، پسینہ اور آواز میں لڑکھڑاہٹ شاملِ ہیں اس لیے عمومی طور پر ذہنی تناؤ کو ایک منفی ردعمل کے طور پر دیکھا جاتا ہے لیکن کام کا دباؤ ہمارے لیے ایک مثبت تحریک کا کام بھی کرتاہے جو پیداراریت میں اضافے اور کام کے معیار میں بہتری کا باعث بھی ہوتا ہے۔
انہوں نے کہا کہ ضروری ہے کہ ہم اپنے آپ کو پر سکون رکھیں، صحت مند جسمانی اور ذہنی سرگرمیوں کو زندگی کا معمول بنائیں، روزمرہ زندگی کے لیے مذہب نے جو معمولات طے کئے ہیں ان پر عمل پیرا ہو کر ہم اپنی سوچ کو مثبت اور ذہنی دباؤ کے منفی اثرات سے پاک رکھ سکتے ہیں۔