کام نہ کرنے والے پرائس مجسٹریٹس کی ضلع جہلم میں کوئی ضرورت نہیں۔ ڈپٹی کمشنر سمیع اللہ فاروق

جہلم: ڈپٹی کمشنر جہلم کیپٹن (ر) سمیع اللہ فاروق کی زیرصدارت پرائس کنٹرول مجسٹریٹس کی کارکردگی کا جائزہ لینے کیلئے اجلاس منعقد ہوا۔

ڈپٹی کمشنر نے فرداً فرداً تمام پرائس مجسٹریٹس کی کارکردگی کا جائزہ لیا، ڈپٹی کمشنر نے تمام پرائس کنٹرول مجسٹریٹس کو سختی سے ہدایت کر رکھی ہے کہ وہ پرائس چیکنگ روزانہ کی بنیادوں پر کریں، انسپکشن کو بڑھائیں اور اس عمل میں سستی اور غفلت برداشت نہیں کی جائے گی، کام نہ کرنے والے پرائس مجسٹریٹس کی ضلع میں کوئی ضرورت نہیں۔

انہوں نے کہا کہ ضلع میں اشیائے ضروریہ کی قیمتوں میں توازن برقرار رکھنے کیلئے تمام مجسٹریٹس اپنی کارکردگی بہتر بنائیں اور مارکیٹ میں اشیائے خوردونوش کی قیمتوں کی چیکنگ کے عمل کو مزید تیز کریں۔

انہوں نے کہا کہ ماہ فروری کے دوران اب تک پرائس کنٹرول مجسٹریٹس نے 3 ہزار 5 سو سے زائد چھاپے مار کر 86 خلاف ورزیاں پکڑی جس پر گراں فروشوں کو مجموعی طور پر 9 لاکھ 59 ہزار سے زائد کے جرمانے کیے گئے جبکہ 5 گرفتاریاں عمل میں لائی گئی۔