گیس کی غیر قانونی ری فلنگ کے دھندہ سے جہلم کے رہائشیوں کی زندگیاں داؤ پر لگ گئیں
جہلم: گیس کی غیر قانونی ری فلنگ کے دھندہ سے شہر اورگردونواح میں رہائشیوں کی زندگیاں داؤ پر لگ گئیں، ضلعی انتظامیہ شہریوں کی جانیں داؤ پر لگانے والوں کے خلاف مستقل بنیادوں پر کارروائیاں کرنے کی بجائے خاموش تماشائی کا کردار ادا کرنے لگی۔
تفصیلات کے مطابق سول ڈیفنس کے ذمہ داران کی غفلت، لا پرواہی اور پراسرار طور پر چشم پوشی سے شہر سمیت ضلع بھر کے علاقوں میں ایل پی جی گیس فروخت کرنے والے دکانداروں کی طرف سے بڑے سلنڈروں سے چھوٹے سلنڈروں میں بذریعہ موٹر مشین، خطرناک طریقے سے گیس منتقلی کا غیر قانونی کارروبارعروج پر پہنچ گیا ہے۔
دکانداروں کی طرف سے گنجان آباد شہری علاقوں میں سرعام گیس کی خطرناک طریقے سے ری فلنگ کرنے سے انسانی زندگیاں داؤ پر لگ چکی ہیں اور کسی بھی وقت کوئی ناخوشگوار واقعہ رونما ہو سکتا ہے۔
ضلعی انتظامیہ اور سول ڈیفنس محکمہ کی طرف سے ایل پی جی گیس کی غیر قانونی ری فلنگ میں ملوث عناصر کے خلاف مستقل بنیادوں پر کارروائی نہ ہونے کی وجہ سے ری فلنگ کا کارروبار عروج پکڑتا جا رہا جبکہ گنجان آباد علاقوں میں جاری اس گھناؤنے کارروبار کیوجہ سے پڑوسیوں کی زندگیاں خطرے میں مبتلا ہیں۔
عوامی سماجی حلقوں نے ارباب اختیار سے نوٹس لینے کا مطالبہ کیا ہے۔