جہلم شہر میں گاڑیوں، موٹر سائیکلوں اور چنگ چی رکشوں کی بھرمار، ٹریفک کے ان گنت مسائل پیدا ہونے لگے

جہلم: شہر میں گاڑیوں، موٹر سائیکلوں، چنگ چی رکشوں کی بھرمار سے ٹریفک کے ان گنت مسائل پیدا ہونے لگے، چوک چو راہوں اور پبلک مقامات پر ٹریفک جام ہونا معمول بن گیا، ٹریفک پولیس کی عدم موجودگی کی وجہ سے شہریوں کے مسائل میں اضافہ ہوگیا، شہریوں نے ڈی پی او جہلم سے نوٹس لینے کا مطالبہ کر دیا۔

تفصیلات کے مطابق شہر کی تمام سڑکوں کے اطراف کارروباری مراکز کثیر منزلہ پلازے شاپنگ مال اور نجی شعبوں کے وسیع نیٹ ورک پھیل چکا ہے جس سے پارکنگ کا مسئلہ تیزی کے ساتھ شدت اختیار کرتا جا رہا ہے۔ شاندار چوک کے چاروں اطراف چنگ چی رکشہ ڈرائیوروں نے ٹریفک پولیس کی سرپرستی میں رکشے کھڑے کر کے شہریوں کی مشکلات میں اضافہ کررکھا ہے۔

سول ہسپتال، چوک گنبد والی مسجد، جی ٹی ایس چوک، محمدی چوک، روہتاس روڈ، کچہری چوک، قبرستان چوک، خواتین کالج سمیت دیگر چوک چوراہوں اور پبلک مقامات پر ٹریفک پولیس کی عدم موجودگی کیوجہ سے رکشہ ڈرائیوروں نے شہر کے چوک چوراہوں کو رکشہ اسٹینڈ میں تبدیل کر رکھا ہے، جس کی وجہ سے پڑوسی اضلاع سے خریداری کے لئے آنے والے صارفین اور مقامی شہریوں کو شدید مشکلات کا سامنا کرنا پڑتا ہے۔

رکشے سڑکوں پر کھڑے ہونے کی وجہ سے ریسکیو 1122 ، فائربریگیڈ اور ایمبولنسسز کو بھی گزرنے میں مشکلات کا سامنا کرنا پڑتا ہے جبکہ میجر اکرم شہید نشان حیدر کی یادگار کے باہر میونسپل کمیٹی کے شعبہ انکروچمنٹ کی سرپرستی میں لنڈا بازار قائم ہو چکا ہے میونسپل کمیٹی کے ذمہ داران سب کچھ جاننے کے باوجود خاموش تماشائی کا کردار ادا کر رہے ہیں۔ میجر اکرم شہید نشان حیدر کی یاد گار پر آنے والے شہریوں کو پارکنگ نہ ہونے کی وجہ سے گاڑیاں کھڑی کرنے میں شدید مشکلات کا سامنا کرنا پڑ رہا ہے۔

شہریوں کا کہنا ہے کہ اگر کوئی شخص میجر اکرم شہید یادگار کی پارکنگ میں گاڑی کھڑی کرنی چاہے تو ریڑھی بان گالی گلوچ سے بھی گریز نہیں کرتے، شہریوں نے گریژن آفیسر کمانڈر، ڈپٹی کمشنر، ڈی ایس پی ٹریفک پولیس سے نوٹس لینے اور میجر اکرم شہید نشان حیدر کی یادگار کے باہر قائم ہونے والے لنڈا بازار کے خاتمے کا مطالبہ کیا ہے۔