جہلم: آئیسکو سرکل جہلم واپڈا صارفین سڑکوں پر، بجلی کی قیمتوں میں اضافہ، صارفین کے صبر کا پیمانہ لبریز، جی ٹی ایس چوک کو خواتین نے ٹریفک کے لئے بند کر دیا۔
تفصیلات کے مطابق وفاقی حکومت کی جانب سے بجلی کی قیمتوں میں آئے روز اضافہ اور نئے ٹیکسز عائد کئے جانے پر صارفین کے صبرکا پیمانہ لبریز ہو گیا ہے۔ صارفین نے حکومتی کارکرد گی سے مایوس ہو کر شہر کے اہم چوک جی ٹی ایس چوک کے قریب آئیسکو واپڈا سرکل جہلم کے باہر بجلی کے بلوں کو ہاتھوں میں پکڑ کر شدید احتجاج کرتے ہوئے ہر قسم کی ٹریفک کا گزرنا بند کر دیا اور وفاقی حکومت کے خلاف شدید نعرے بازی بھی کی۔
اس موقع پر مظاہرین کا کہنا تھا کہ اپوزیشن میں بیٹھ کر تحریک انصاف کی حکومت پر تنقید کر نے والے حکمرانوں نے اقتدار میں آکر ملک کے کسانوں، زمینداروں اور محنت کشوں کو زندہ درگو رکر دیا ہے۔
خواتین مظاہرین نے کہا کہ مو جودہ حکومت کی ناقص پالیسیوں کی وجہ سے زراعت کا شعبہ اور ملکی معیشت تباہی کے دہانے پر پہنچ چکی ہے۔ اگر شہباز شریف کی حکومت نے ملک کے غریب عوام اور کسانوں کی مشکلات کا مداوا نہ کیا تو آمدہ انتخابات میں ہم سے دوٹوں کی توقع بھی نہ رکھی جائے۔
جی ٹی ایس چوک میں گاڑیوں کی لمبی قطاریں لگ جانے پر انتظامیہ نے پھرتی کا مظاہرہ کرتے ہوئے مذاکرات کے بعد مذکورہ چوک کوٹریفک کے لئے کھلوا دیا۔