سبزی منڈی جہلم گندگی کی آماجگاہ میں تبدیل، تعفن پھیلنے سے خریداروں اور علاقہ مکینوں کی زندگی اجیرن

جہلم: سبزی منڈی گندگی کی آماجگاہ میں تبدیل ، تعفن اور بدبو پھیلنے سے خریداروں سمیت ملحقہ آبادیوں کے مکینوں کی زندگی اجیرن ، ٹریفک کا نظام بھی بری طرح متاثر، عوامی ، شہری ، سماجی ، رفاعی ، فلاحی حلقوں نے چیئرمین میونسپل کمیٹی سے نوٹس لینے کا مطالبہ کر دیا۔

تفصیلات کے مطابق جی ٹی روڈ سے ملحقہ جادہ کے مقام پر قائم سبزی منڈی ملحقہ آبادیوں کے مکینوں کے لئے عذاب بن گئی ، سبزی و فروٹ منڈی میں مبینہ طور پر صفائی ستھرائی کے ناقص انتظامات ہونے کی وجہ سے بارشوں اور سردی کے موسم میں تعفن اور بدبو اسقدر زیادہ ہوتی ہے کہ منڈی سے گزرتے وقت صارفین سمیت راہگیروں کو سانس لینے میں بھی دشواری کا سامناکرنا پڑتا ہے۔

منڈی میں اشیاء خوردونوش خریدنے کے لئے آنے والے صارفین گندگی کیوجہ سے مشکلات میں مبتلا ہو تے ہیں ،راہگیروں کے کپڑے گندگی کیوجہ سے تباہ و برباد ہو رہے ہیں ، صفائی ستھرائی کا مناسب بندوبست نہ ہونا میونسپل کمیٹی کے ذمہ داران کی کارکردگی پر سوالیہ نشان ہے، جگہ جگہ کھڑے گندے پانی کے جوہڑوں کیوجہ سے مچھروں کی افزائش نسل میں بھی اضافہ ہو رہا ہے۔

صبح اور شام کے اوقات میں پھل و سبزیاں لانے والے ٹرکوں، لوڈر رکشوں ، چنگ چی رکشوں، گدھا گاڑیوں ، ریڑھی بانوں کی وجہ سے سڑک سے گزرنے والی ٹریفک کا نظام بھی شدید متاثر ہو تا ہے ، اسی وجہ سے سبزی و فروٹ منڈی جہاں شہریوں کی زندگیوں کے لئے عذاب بن چکی ہے وہیں تاجر برادری کے کارروبار پر بھی انتہائی منفی اثرات مرتب کر رہی ہے سبزی وفروٹ منڈی کی جگہ کم ہونے کی وجہ سے رش میں چوری چکاری ، جیب تراشی کی وارداتوں میں بھی غیر معمولی اضافہ ہو چکا ہے ۔

سبزی و فروٹ منڈی کے مسائل میں اضافہ ہونے سے شہری تنظیموں کے عہدیداروں سمیت عوامی ، سماجی ،رفاعی ، فلاحی حلقوں نے چیئرمین میونسپل کمیٹی ، چیف آفیسر میونسپل کمیٹی سے مطالبہ کیا ہے کہ سبزی منڈی کی روزانہ کی بنیاد پر صفائی کروائی جائے تاکہ شہری بیماریوں سے محفوظ رہ سکیں ۔