نیشنل کانفرنس؛ جہلم سے 6 دسمبر کو بڑا قافلہ اسلام آباد روانہ ہو گا، حافظ عبدالحمید عامر

جہلم: 6 دسمبر کو نیشنل کانفرنس میں شرکت کے لیے جہلم سے ایک بڑا قافلہ اسلام آباد روانہ ہو گا۔

ان خیالات کا اظہار جامعہ علوم اثریہ کے مہتمم اور مرکزی جمعیت اہل حدیث پاکستان کے نائب امیر حافظ عبدالحمید عامر نے ایک مشاورتی اجلاس میں کیا۔ انہوں نے کہا کہ جہلم کے عوام مظلوم فلسطینی بھائیوں کے ساتھ اظہار یکجہتی کے لیے بڑی تعدادمیں قافلے کی صورت میں نیشنل کانفرنس میں شرکت کریں گے۔

حافظ عبدالحمید عامر نے کہا کہ مجھے لوگوں سے مل کر بڑا حوصلہ ملا کہ اہلیان جہلم اس حوالے سے بڑا جوش و جذبہ رکھتے ہیں اور ہر طرح سے اپنے فلسطینی بھائیوں کے حق میں اپنی آواز اٹھانا چاہتے ہیں۔

کانفرنس کے حوالے سے انہوں نے کہا کہ ایک بڑے پلیٹ فارم پر ایسے پروگرام کی حالات حاضرہ کے مطابق اشد ضرورت تھی۔ مذہبی جماعتوں کے قائدین کا یہ فیصلہ قابل تحسین اور لائق ستائش ہے۔

حافظ عبدالحمید عامر نے کہا کہ ملک بھر کی مذہبی، سیاسی اور سماجی شخصیات کانفرنس سے خطاب کریں گے اور عوام الناس کو فلسطین کی موجودہ صورت حال کے حوالے سے اپنے لائحہ عمل اور ایک متفقہ نکتہ نظر سے آگاہ کریں گی، کیونکہ اس امر کی شدید ضرورت ہے کہ مسلمانوں کو قومی اور بین الاقوامی سطح پر بیدار کیا جائے اور فلسطین میں ہونے والے ظلم کو رکوانے کے لیے مؤثر اقدامات اٹھائیں جائیں اور اس حوالے سے بیداری مہم چلائی جائے۔

حافظ عبدالحمید عامر نے مزید کہا کہ 6 دسمبر بروز بدھ کو گردو نواح سے قافلے سب سے پہلے جامعہ علوم اثریہ جہلم جمع ہوں گے اور بعد ازاں 9 بجے صبح ایک بڑے قافلے کی صورت میں اسلام آباد کی طرف روانہ ہوں گے۔

یہ بھی پڑھنا مت بھولیں

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

Back to top button