جہلم میں گیس کا کم پریشر اور سوئی گیس کی لوڈشیڈنگ شہریوں کیلئے وبال جان بن گئی

جہلم: گیس کا کم پریشر ، سوئی گیس کی لوڈ شیڈنگ شہریوں کیلئے وبال جان بن گئی، شہری محکمہ سوئی گیس کے خلاف سراپا احتجاج ہیں۔

تفصیلات کے مطابق سردی کی شدت میں اضافہ کے ساتھ ہی گیس کے کم پریشر نے شہریوں کو ایک بار پھر زہنی کوفت میں مبتلا کرکے رکھ دیاہے۔

بلال ٹاؤن، پروفیسر کالونی، آفیسر کالونی، مشین محلہ، محمدی چوک، شمالی محلہ، بورڈنگ محلہ، جادہ، کالا گجراں، محمود آباد سمیت دیگر علاقوں میں گیس کے کم پریشر اور لوڈشیڈنگ کی وجہ سے صارفین کو کھانا بنانے میں شدید مشکلات کا سامنا کرنا پڑ رہا ہے۔

صبح اور رات کے اوقات میں گیس کا انتہائی کم پریشرہوتا ہے جبکہ اندرون شہر کے بعض علاقوں میں گیس بالکل بھی نہیں آتی۔

شہریوں کا کہنا تھا کہ جب بھی کھانا بنانے کا وقت ہو تا ہے گیس کا پریشر نہ ہونے کے برابر ہوتا ہے جس کیوجہ سے نہ تو چولہے جلتے ہیں اور نہ ہی مہنگے داموں ہوٹلوں سے خرید کر بچوں کو کھانا مہیا کر سکتے ہیں۔

حکومت گیس کے پریشر میں بہتری کے لئے اقدامات اٹھائے یا مہنگائی کو کنٹرول کرنے میں کردار ادا کرے تاکہ غریب سفید پوش طبقہ سے تعلق رکھنے والے افراد اپنے بچوں کو 2 وقت روٹی مہیاکر سکیں ۔