جہلم شہر کی اہم سڑکوں پرجگہ جگہ گہرے گڑھے، شہریوں کو آمدورفت میں مشکلات کا سامنا

جہلم: بلال ٹاؤن روڈ، کمیلا روڈ، پولیس لائن روڈ سمیت شہر کی اندرونی سڑکوں پرجگہ جگہ گہرے گڑھے،گڑھوں میں کیچڑ و بارشی پانی بھرجانے سے شہریوں سمیت موٹر سائیکل سواروں کو آمدورفت میں مشکلات کا سامنا، مذکورہ سڑکیں زمین میں دھنس چکی ہیں جس کے باعث گاڑیوں، موٹرسائیکل سواروں سمیت دیگر ٹریفک کو آمدورفت میں شدید مشکلات کا سامنا،شہری سراپا احتجاج ہیں۔

تفصیلات کے مطابق بلال ٹاؤن روڈ، کمیلا روڈ، پولیس لائن روڈ سمیت اندرون شہر کی بیشتر سڑکوں پر جگہ جگہ بننے والے گڑھوں کی وجہ سے چھوٹی گاڑیوں، موٹرسائیکل سواروں، چنگ چی رکشوں اور عام شہریوں کو سڑک پر سفر کرنے میں شدید مشکلات کا سامنا کرنا پڑ رہا ہے۔

اس حوالے سے شہریوں نے اخبار نویسوں سے خصوصی گفتگو کرتے ہوئے کہا کہ بلال ٹاؤن روڈ، کمیلا روڈ، پولیس لائن روڈ کئی سال قبل تعمیر کی گئی اس کے بعد شہر کے اندر سیوریج پائپ لائنیں بچھائی گئیں اس وقت سے نہ تو سڑکیں مرمت کی گئیں اور نہ ہی سڑک کو از سر نو تعمیر کیا گیا، جس کی وجہ سے مذکورہ سڑکوں کی حالت ابتر ہو چکی ہے۔

شہریوں نے کہا کہ یہ سڑکیں مضافاتی علاقوں کو شہر سے ملانے میں اہمیت کی حامل ہونے کے ساتھ ساتھ شہر کے تمام سرکاری و تجارتی ادارے موجود ہیں، سڑکوں میں بننے والے گڑھوں کی وجہ سے شہریوں کی قیمتی گاڑیاں کھٹارہ بنتی جا رہی ہیں۔ ہسپتالوں میں آنے والی ایمبولینسسز اور مریضوں کو سڑکوں کی ٹوٹ پھوٹ کی وجہ سے شدید مشکلات کا سامنا کرنا پڑتا ہے۔

انہوں نے کہا کہ منتخب ممبران قومی و صوبائی اسمبلی 4 سالوں کا عرصہ گزرجانے کے باوجود شہر کی سڑکوں کی بہتری کے لئے فنڈز کا اجراء نہیں کروا سکے اور انتظامیہ نے بھی اس حوالے سے مکمل خاموشی اختیار کر رکھی ہے۔

شہریوں نے وزیراعلیٰ پنجاب، چیف جسٹس لاہور ہائی کورٹ، منتخب ممبران قومی و صوبائی اسمبلی سمیت چیف سیکرٹری پنجاب سے مطالبہ کیا ہے کہ مذکورہ سڑکوں کی از سر نو تعمیر کروائی جائے تاکہ شہریوں کو پیش آنے والی مشکلات میں کمی واقع ہو سکے۔