مسلم لیگ ن ہی واحد جماعت ہے جو حالات کو بہتر کر سکتی ہے۔ شاہد خاقان عباسی

جہلم: شاہد خاقان عباسی نے کہا ہے کہ عمران خان کے لانگ مارچ کا واحد مقصد آرمی چیف کے انتخاب پر اثر انداز ہونا ہے، چھبیس نومبر کوسپہ سالار کی تعیناتی کا فیصلہ ہونا ہے،وزیر اعظم سمری میں سے کسی ایک کو تعینات کریں گے ۔

جہلم میں مسلم لیگ ن کے ورکرز کنونشن سے خطاب کرتے ہوئے سابق وزیر اعظم اور مسلم لیگ ن کے سینئر نائب صدر شاہد خاقان عباسی نے کہا کہ اگلے انتخابات میں فتح ن لیگ کی ہو گی2018 کے انتخابات چوری کیے گئے آج کے حالات کی وجہ چوری الیکشن ہیں۔

انہوں نے کہا ہم نے محنت سے نواز شریف کو کامیاب بنانا ہے 2023 میں انشاء اللہ پورا یقین ہے کہ ہمیں تاریخی کامیابی ملے گی۔کوئی شبہ نہیں کہ آج مشکل حالات ہیں مسلم لیگ ن نے مشکل فیصلے کیے،جب ایک نظام خراب ہو جائے تو اسے ٹھیک کرنے میں وقت لگتا ہے۔

شاہد خاقان عباسی نے کہا ہمیں احساس ہے کہ عوام تکلیف میں ہیں،مسلم لیگ ہی واحد جماعت ہے جو حالات کو بہتر کر سکتی ہے بات صرف سیاست یا نشستوں کی نہیں ہے ہمیں دیکھنا ہے کہ ملک کے حالات کس طرف جا رہے ہیں عمران خان نے چھ ماہ گالیاں دینے کے سوا کچھ نہیں کیا،لیڈر ملک و قوم کو انتشار سے بچاتے ہیں وہ ایک دوسرے کو گالیاں نہیں دیتے آج ملک کو اتفاق کی ضرورت ہے جس گھر میں جھگڑے ہوں وہ گھر نہیں چل سکتا۔

سابق وزیر اعظم کا کہنا تھا کہ عمران خان کے لانگ مارچ کا واحد مقصد آرمی چیف کے انتخاب پر اثر انداز ہونا ہے، چھبیس نومبر کوسپہ سالار کی تعیناتی کا فیصلہ ہونا ہے،وزیر اعظم سمری میں سے کسی ایک کو تعینات کریں گے۔ مسلح افواج کے سپہ سالار کی سلیکشن متنازع ہو گی تو فائدہ دشمنوں کو ہو گا۔ کچھ چیزیں ایسی ہوتی ہیں جن پر سیاست نہیں کی جاسکتی،عمران خان اس معاملے پر بھی اثر انداز ہونا چاہتا ہے۔

انہوں نے کہاکہ عمران خان نے روس، چین اور امریکہ سمیت سب سے تعلقات بگاڑے امریکہ کی سازش سے لیکر عمران خان کی ہر بات جھوٹی ثابت ہوئی، انہوں نے کامیاب کنونشن کے انعقاد پر جہلم کے روکرز کو بھی خراج تحسین پیش کیا۔

قبل ازیں ورکرز کنونشن سے ڈویژنل صدر ملک ابرار، سابق ایم این اے نوابزادہ مطلوب مہدی ، سابق ایم پی اے چوہدری ندیم خادم، مہر محمد فیاض، راجہ اویس خالد اور ممبر صوبائی اسمبلی حاجی ناصر للہ کے علاوہ ضلعی صدرچوہدری محمد بوٹا جاوید نے بھی خطاب کیا۔