شجرکاری ماحول کے تحفظ اور زمین کو سنوارنے کے ساتھ بارشوں کا قدرتی ذریعہ ہے۔ راجہ یاور کمال
سوہاوہ: محکمہ جنگلات کے زیر اہتمام فشریز نرسری سوہاوہ میں شجرکاری تقریب کا انعقاد کیا گیا جس میں ممبر صوبائی اسمبلی راجہ یاور کمال، اسسٹنٹ کمشنر انعم بابر اور اسسٹنٹ ڈائریکٹر فشریز امیر نواز نے بطور مہمان خصوصی شرکت کی اور نرسری میں پودے لگائے۔
اس موقع پر اسسٹنٹ کمشنر سوہاوہ انعم بابر نے کہا کہ ہم سب کو شجرکاری مہم میں بھرپور حصہ لینا چاہیے، پودے لگانے کے ساتھ انکی حفاظت کرنا ایک اہم ذمہ داری ہے تا کہ پودا درخت بن کر ہمیں پھل، پھول اور سایہ دے۔
ایم پی اے راجہ یاور کمال نے کہا کہ ہم سب کو مل کر سرسبز پاکستان بنانے کے لیے جدوجہد کرنی چاہیے، شجرکاری ماحول کے تحفظ اور زمین کو سنوارنے کے ساتھ بارشوں کا قدرتی ذریعہ ہے۔
انہوں نے کہا کہ شدید گرمی، سیلاب سے بچاؤ کیلئے شجرکاری مہم انتہائی اہمیت کی حامل ہے اور گرمی کی شدت کی ایک بڑی وجہ درختوں کی کٹائی ہے، ہمیں اس عمل کو روکنے کیلئے اپنا مناسب کردار ادا کرنا ہو گا۔