آئی جی پنجاب نے عوامی مشکلات کے فوری ازالے کے لئے نئی ڈیجیٹل سروسز بنا دی گئی

جہلم: عوامی مشکلات کے فوری ازالے اور انہیں فوری ریلیف دینے کیلئے پنجاب پولیس نے دو نئی سروسز کا آغاز کر دیا۔

سنٹرل پولیس آفس میں منعقدہ تقریب میں پنجاب پولیس واٹس ایپ سروسز اور آن لائن کمپلینٹ مینجمنٹ سسٹم کا آغاز کیا گیا۔ آئی جی پنجاب فیصل شاہکار نے پنجاب پولیس کی دونوں سروسز کا ڈیجیٹل افتتاح کر دیا۔

آئی جی پنجاب فیصل شاہکار نے کہا کہ پنجاب پولیس نے شہریوں کو خدمات کی فوری فراہمی کیلئے واٹس ایپ سروس شروع کی ہے۔پنجاب پولیس کا واٹس ایپ نمبر 03317871787 ہے جس سے ہر شہری مستفید ہو سکتا ہے۔اس نمبر پر شہری ہیلو یا سلام لکھ کر بھیجیں تو پولیس کی 15 سروسز کی تفصیل سامنے آ جائے گی۔

انہوں نے کہا کہ معلومات کے حصول کیلئے شہریوں کو کسی دفتر جانے کی ضرورت نہیں بلکہ گھر بیٹھے اپنے موبائل سے ہی پولیس سروسز تک رسائی حاصل کر سکتے ہیں، عوام کی سہولت کیلئے پنجاب پولیس کے شکایات مینجمنٹ سسٹم کو بھی آن لائن کردیا گیا ہے۔

انہوں نے کہا کہ شہری آن لائن اپنی شکایات درج کرا کے نہ صرف ای ٹیگ نمبر حاصل کر سکتے ہیں بلکہ شکایات پر ہونے والی کارروائی بارے لمحہ بہ لمحہ اپ ڈیٹ بھی لے سکتے ہیں اوورسیز پاکستانیوں کو بھی اس سروس کے تحت کہیں بھی بیٹھے معلومات مل سکتی ہیں۔مستقبل میں مزید سروسز بھی اس میں شامل کی جائیں گی۔ شہریوں کی شکایات پر تاخیر سے ایکشن لینے والوں کے خلاف بھی کارروائی کی جائے گی۔