جہلم میں مضر صحت قلفیاں اور برف کے گولوں کی فروخت عروج پر پہنچ گئی
جہلم: شہر اور گردونواح میں مختلف چوک چوراہوں، مضافاتی علاقوں کے سکولوں اور سڑکوں کے اطراف میں قلفیاں اور برف گولے فروخت کرنے والے افراد نے سکرین اور مضر صحت شربت سے تیار کردہ برف کے گولے، قلفیوں کی فروخت دیدہ دلیری سے شروع کر رکھی ہے۔
اکثر علاقوں میں برف گولے قلفیاں فروشوں نے تشہیر کے لئے لاؤڈ سپیکر استعمال کرنے شروع کر رکھے ہیں۔ برف گولے فروش سکرین اور مضر صحت کیمیکل ملا رنگ استعمال کر کے چھوٹے چھوٹے معصوم بچوں میں بیماریاں بانٹنے کا کام کر رہے ہیں، جس کے نتیجے میں کمسن بچے مختلف مہلک امراض جن میں گیسٹرو، ہیپا ٹائٹس، معدے سمیت دیگر موذی بیماریوں کا شکار ہوکر ہسپتالوں کا رخ کر رہے ہیں۔
رہی سہی کسر جعلی جوس اور ملٹی نیشنل کمپنیوں کے ناموں سے ملتے جلتے ناموں پرتیار کی جانے والے جعلی دو نمبر جو سز آئس کریم اور قلفیوں نے پوری کر رکھی ہے، گلی محلوں سمیت بڑی بڑی دکانوں پر ناقص ومضر صحت قلفیاں، جوسز، آئس کریم سپلائی کر کے راتوں رات کروڑ پتی بننے کے خواب دیکھ رہے ہیں، جن کے استعمال سے بچوں سمیت عورتیں، نوجوان لڑکیوں اور بوڑھوں میں مختلف بیماریاں پھیل رہی ہیں۔
شہریوں نے ڈی جی پنجاب فوڈ اتھارٹی سے نوٹس لینے کا مطالبہ کیا ہے۔