بہبود آبادی کا عملہ صحت مند معاشرے کیلئے اپنے فرائض محکمہ صحت کے ساتھ مل کر ادا کر رہا ہے۔ حسن خالد وڑائچ
جہلم: محکمہ بہبود آبادی جہلم کی ڈسٹرکٹ ٹیکنیکل کمیٹی کا ماہانہ اجلاس ڈاکٹر میاں مظہر حیات چیف ایگزیکٹو آفیسر ہیلتھ کی زیر صدارت منعقد ہوا۔
حسن خالد وڑائچ ضلعی آفیسر محکمہ بہبود آبادی جہلم نے شرکاء کو محکمہ بہبود آبادی کی ماہانہ کارکردگی کا جائزہ پیش کیا جس میں محکمہ بہبود آبادی کی جانب سے فراہم کی گئی خدمات، مانع حمل ادویات اور ماں بچے کی صحت اور خاندانی منصوبہ بندی بارے آگاہی مہم شامل ہیں جبکہ انسداد ڈینگی مہم اور پولیو ویکسینیشن مہم میں محکمہ بہبود آبادی کے فعال کردار بارے آگاہ کیا اور بتایا کہ ضلع جہلم میں پچاس سے زائد محکمہ بہبود آبادی جہلم کا عملہ صحت مند معاشرے کے لیے اپنے فرائض محکمہ صحت کے ساتھ مل کر ادا کررہا ہے۔
ڈاکٹر میاں مظہر حیات چیف ایگزیکٹو آفیسر محکمہ صحت جہلم نے محکمہ بہبود آبادی اور محکمہ صحت کے مثالی تعاون کو سراہا اور اس بات کا عہد کیا کہ ضلع جہلم میں عوام الناس کی بہتری اور بہتر خدمات کی فراہمی کے لیے محکمہ بہبود آبادی اور محکمہ صحت کے مابین تعاون جاری رہے گا۔
اجلاس میں دونوں محکموں کے عملہ کے درمیان باہمی روابط کے فروغ، تربیتی سیشنز بہتر خدمات اور سہولیات کی فراہمی کے لیے مشترکہ لائحہ عمل تیار کرنے پر اتفاق کیا گیا۔