جہلم میں موسم سرد شروع ہوتے ہی غیر معیاری اور مضر صحت مچھلی کی فروخت کا کارروبار عروج پکڑ گیا
جہلم: شہر اور گردونواح میں قائم ہوٹلوں میں موسم سرد شروع ہوتے ہی غیر معیاری اور مضر صحت مچھلی کی فروخت کا کارروبار عروج پکڑ رہا ہے۔ شہری مضر صحت اور ناقص مچھلی استعمال کرنے سے بیماریوں میں مبتلا ہونے لگے۔
تفصیلات کے مطابق شہر و گردونواح میں سماج دشمن عناصر موسم تبدیل ہوتے ہی ہوٹلوں میں غیر معیاری مچھلی کی فروخت شروع کر دیتے ہیں، گندے تالابوں، جوہڑوں سے پکڑی جانے والی اور دیگر اضلاع سے منگوائی جانے والی غیر معیاری باسی اور مضر صحت مچھلیوں کو ہوٹلوں کے مالکان چٹ پٹے مصالحے لگا کر ناقص و باسی مچھلی مہنگے داموں فروخت کر کے شہریوں کا خون نچوڑ تے دکھائی دیتے ہیں۔
موسم سرد ہونے پر مچھلی کی مانگ میں غیر معمولی اضافہ ہوجاتاہے، ہوٹل مالکان مچھلی فروخت کرنے کی آڑ میں ناقص و غیر معیاری باسی مچھلی کو چٹ پٹے مصالحے لگا کر مہنگے داموں فروخت کر رہے ہیں۔
پنجاب فوڈ اتھارٹی کے ذمہ داران ان ہوٹلوں کے بااثر مالکان کے خلاف کارروائیاں کرنے سے گریزاں ہیں جس کی وجہ سے شہری مختلف مہلک موذی امراض میں مبتلا ہو رہے ہیں، شہر کے مختلف علاقوں اور جی ٹی روڈ کے دونوں اطراف قائم ہوٹلز مالکان چٹ پٹے مرچ مصالحے لگا کر شہریوں میں مچھلی فروخت کر کے بیماریاں بانٹ رہے ہیں۔
شہر کی سماجی، مذہبی، رفاعی، فلاحی تنظیموں کے عمائدین نے ڈی جی پنجاب فوڈ اتھارٹی سے اصلاح و احوال کا مطالبہ کیا ہے ۔