رمضان المبارک کے مقدس مہینے میں بھی جہلم شہر کی سٹریٹ لائٹس مرمت نہ کی جا سکیں
جہلم: میونسپل کمیٹی کا شعبہ الیکٹرک سٹی غیر فعال، رمضان المبار ک کے مقدس مہینے میں بھی اندرون شہر کی سٹریٹ لائٹس مرمت نہ کی جا سکیں، شہر کی سڑکوں پر گھپ اندھیرا، میونسپل کمیٹی کے ذمہ داران نے چپ سادھ لی، چوری چکاری کی وارداتوں کا خدشہ، شہری میونسپل کمیٹی کے ذمہ داران کے خلاف سرا پا احتجاج ہے۔
تفصیلات کے مطابق اندرن شہرکے گلی محلوں سمیت اہم سڑکوں پرنصب سٹریٹ لائٹس جو کافی عرصہ سے خراب پڑی ہیں مرمت نہ ہونے کی وجہ سے شہر کی سڑکوں پر گھپ اندھیرا چھا جاتا ہے۔
میونسپل کمیٹی کی انتظامیہ ہر سال بجٹ کے موقع پر سٹریٹ لائٹس کی تبدیلی و درستگی کا بجٹ منظور کرتی ہے جو لاکھوں روپے میں ہوتا ہے، لیکن بجٹ منظور ہونے کے باوجود اس گھمبیر مسئلے کی طرف بالکل توجہ نہیں دی جا تی جس کی وجہ سے رات کے وقت راہگیروں، سائیکل سواروں، موٹر سائیکل سواروں کو شدید مشکلات کا سامنا کرنا پڑتا ہے۔
سٹریٹ لائٹس ناکارہ ہونے کے سبب چوری چکاری کی وارداتوں کا بھی خدشہ بڑھ چکاہے۔ میونسپل کمیٹی کے چیف آفیسر، ایڈمنسٹریٹر میونسپل کمیٹی نے بھی سٹریٹ لائٹس کی درستگی کے حوالے سے مکمل لاتعلقی اختیار کر رکھی ہے جس کی وجہ سے شہریوں کی مشکلات میں غیر معمولی اضافہ ہو چکاہے۔
شہریوں نے ڈپٹی کمشنر، ایڈمنسٹریٹر میونسپل کمیٹی سے مطالبہ کیا ہے کہ اندرون شہر سمیت اولڈ جی ٹی روڈ پر نصب سٹریٹ لائٹس کو بحال کروایا جائے اور میونسپل کمیٹی کی انتظامیہ کی توجہ اس گھمبیر مسئلے کی طرف مبذول کروائی جائے تاکہ شہری میونسپل کمیٹی کی سہولیات سے مستفید ہو سکیں۔