ضلع جہلم میں رواں سال ڈینگی کا کوئی نیا کیس رپورٹ نہیں ہوا۔ ڈاکٹر وسیم اقبال
جہلم: ڈپٹی کمشنر جہلم نعمان حفیظ کی زیر صدارت ضلع بھر میں انسداد ڈینگی اقدامات کا جائزہ لینے کیلئے ڈسٹرکٹ ایمرجنسی ریسپانس کمیٹی کا اجلاس منعقد ہوا جس میں تمام متعلقہ محکموں کے افسران موجود تھے۔
سی ای او ہیلتھ آفیسر ڈاکٹر وسیم اقبال نے بریفنگ دیتے ہوئے بتایا کہ ضلع جہلم میں رواں سال ڈینگی کا کوئی نیا کیس رپورٹ نہیں ہوا، محکمہ ہیلتھ کی ٹیمیں موثر انداز میں ڈینگی سرویلنس کر رہی ہیں۔
اس موقع پر ڈپٹی کمشنر نعمان حفیظ نے تمام متعلقہ محکموں کو ہدایت کی کہ سرویلینس کو مزید بہتر کیا جائے جہاں کہیں لاروا برآمد ہوتا ہے اسے فوری تلف کیا جائے، انہوں نے عوام سے اپیل کی ہے کہ وہ اپنے اردگرد کے ماحول کو صاف ستھرا رکھیں اور احتیاطی تدابیر اپنائیں۔
انہوں نے محکمہ ہیلتھ کو ہدایت کی کہ ڈینگی سرویلینس کو روزانہ کی بنیاد پر مانیٹر کریں، فیلڈ سٹاف کی کارکردگی کا مسلسل جائزہ لیا جائے اور کارروائی کو اینڈرائڈ ایپ پر لوڈ کریں۔ ڈینگی سرویلینس ٹیمیں روزانہ کی بنیاد پر قبرستان ودیگر مقامات کو چیک کریں تاکہ کسی بھی مقام پر ممکنہ ڈینگی لاروے کی افزائش نہ ہو سکے۔