جہلم: سٹی ہاؤسنگ سوسائٹی میں نامعلوم افراد نے فائرنگ کر کے پراپرٹی ڈیلر کو قتل کر دیا، ملزمان فرار ہو گئے، ڈی پی او جہلم کا کرائم سین کا دورہ، ڈی ایس پی صدر سے رپورٹ طلب کر لی۔
تفصیلات کے مطابق سٹی ہاؤسنگ سوسائٹی جہلم میں پراپرٹی آفس میں مسلح افراد کی فائرنگ سے سابق چیئرمین میونسپل کمیٹی جہلم حاجی مرزا راشد ندیم کے قریبی عزیز مرزا تحسین جرال موقع پر جاں بحق ہو گیا، ملزمان موقع سے فرار ہوگئے ہیں۔
ڈی پی او جہلم ناصر محمود باجوہ اور کالا گجراں پولیس نے موقع پر پہنچ کر جائے وقوعہ کا معائنہ کیا، ریسکیو 1122 کے عملے نے نعش پوسٹمارٹم کے لیے سول اسپتال منتقل کر دی ہے۔ ڈی پی او جہلم نے ڈی ایس پی صدر سے رپورٹ طلب کر لی۔
ذرائع سے معلوم ہوا ہے کہ لین دین کے تنازعے پر پہلے مقتول مرزا تحسین کو دھمکیاں دی گئیں ،پھر دفتر میں آ کر ملزمان نے فائرنگ کرکے قتل کیا،سٹی ہاؤسنگ سوسائٹی کے گیٹ پر ڈیلرز نے احتجاج بھی کیا۔
نجی ہاؤسنگ سوسائٹی میں فائرنگ سے شہری کے جانبحق ہونے کا معاملہ، ڈی پی او جہلم ناصر محمود باجوہ کا کرائم سین کا وزٹ، ڈی ایس پی صدر سے رپورٹ طلب
ابتدائی اطلاعات کے مطابق مرزا تحسین جرال نامی شہری کو نامعلوم ملزمان نے فائرنگ کر کے قتل کر دیا، جبکہ
تنازعہ رقم کی لین دین کے باعث pic.twitter.com/BPTfoe4XNJ
— JHELUM POLICE (@police_jhelum) May 29, 2023
ڈی پی او جہلم ناصر محمود باجوہ نے کہا کہ ملزمان کی گرفتاری کے لئے ریڈنگ پارٹیز تشکیل دے دی گئی ہیں، تمام زاویوں سے تحقیقات عمل میں لائی جائیں گی، ملزمان کی گرفتاری کے لئے تمام وسائل بروئے کار لائے جائیں گے۔
واضح رہے کہ سٹی ہاؤسنگ سوسائٹی میں اسلحہ کلچر فروغ پارہا ہے، متعدد بار لڑائی جھگڑے کے حادثات رونما ہوچکے، سٹی ہاؤسنگ سوسائٹی کے مکین موجودہ صورتحال سے پریشان ہیں۔
