ڈسٹرکٹ کوآرڈینیشن کمیٹی جہلم کا اجلاس، پاپولیشن ویلفیئر ڈیپارٹمنٹ کی ماہانہ کارکردگی کا جائزہ لیا گیا
جہلم: ڈسٹرکٹ کوآرڈینیشن کمیٹی جہلم کا اجلاس حاکم خان اسسٹنٹ ڈپٹی کمشنر کوآرڈینیشن جہلم کی زیر قیادت کمیٹی روم ڈپٹی کمشنر آفس جہلم میں ہوا۔ اجلاس میں محکمہ صحت،تعلیم، اطلاعات کے ضلعی سربراہان، علماء کرام اور ایف۔پی۔اے۔پی کے نمائندگان نے شرکت کی جس میں پاپولیشن ویلفیئر ڈیپارٹمنٹ کی ماہانہ کارکردگی کا جائزہ لیا گیا۔
حسن خالد وڑائچ ڈسٹرکٹ پاپولیشن ویلفئیر آفیسر جہلم نے شرکاء کو محکمہ بہبود آبادی کی سرگرمیوں، مانع حمل ادویات کی فراہمی، اور محکمہ کی آگاہی مہم بارے آگاہ کیا اور کہا کہ ڈائریکٹر جنرل پاپولیشن ویلفئیر ڈیپارٹمنٹ پنجاب کے احکامات کے مطابق محکمہ بہبود آبادی کی سرگرمیوں کی تشہیر کے لئے محکمہ کے افسران اور عملہ پر مشتمل میڈیا ٹیم تشکیل دی گئی ہے۔
انہوں نے بتایا کہ لوکل ایف۔ایم ریڈیو پر متوازن گھرانے کے حوالے سے ہفتہ وار پروگرام اور اخبارات میں کالم لکھے جارہے ہیں جن میں ماں بچے کی صحت، نوجوانوں کو درپیش مسائل کے ساتھ دیگر سماجی پہلوؤں کا احاطہ کیا جاتا ہے۔ محکمہ بہبود آبادی اور محکمہ صحت یونین کونسل سوڈھی گجر تحصیل پنڈ دادنخان میں شادی شدہ جوڑوں کی مکمل رجسٹریشن کا آغاز کر رہے ہیں تاکہ مکمل رجسٹریشن کے ذریعے مختلف گروہوں کی نشاندہی کرکے خدمات کی فراہمی میں بہتری لائی جاسکے۔
حاکم خان اسسٹنٹ ڈپٹی کمشنر کوآرڈینیشن جہلم نے محکمہ بہبود آبادی جہلم کی کارکردگی، مختلف سرکاری محکموں میں تعاون اور اشتراک عمل، آگاہی مہم کی سرگرمیوں کو سراہا اور اس امید کا اظہار کیا کہ یہ تمام اقدامات عوام الناس کو تیزی سے بڑھتی ہوئی آبادی بارے آگاہی فراہم کرنے کے ساتھ خاندانی منصوبہ بندی کی خدمات کی فراہمی میں بہتری کا باعث ہوں گے۔