لندن: حکومت پاکستان نے بیرون ملک آباد پاکستانیوں کیلئے حج کی منفرد اسکیم متعارف کرائی ہے جس کے تحت وہ پاکستان سے حج پر جاکر اپنی رقم کی بچت کے علاوہ ملک کو زرمبادلہ کی فراہمی میں معاونت کا ذریعہ بھی بن سکیں گے۔
اس بات کا اظہار برطانیہ کے دورے پر آئے پاکستان کے وفاقی نگراں وزیر برائے مذہبی امور انیق احمد نےکاروباری شخصیت قمر رضا سید کی طرف سے اپنے اعزاز میں منعقد استقبالیہ کے موقع پر خصوصی گفتگو کرتے ہوئے کیا۔ انیق احمد نے کہا کہ اوورسیز پاکستانیوں کیلئے متعارف اسکیم کے تحت50ہزار کا کوٹہ رکھا ہے۔
انہوں نے کہا کہ اس اسکیم سے مستفید ہونے والے افراد حج کے اخراجات کے ضمن میں بڑی بچت کرسکیں گے کیونکہ برطانیہ سے تو حج کے اخراجات 10 ہزار پاؤنڈ تک جا پہنچے ہیں، اس رقم کے صرف 20سے25فیصد حصہ سے پاکستان سے جاکر حج کرنا ممکن ہوگا اور انہیں سہولتوں کی فراہمی پر کوئی سمجھوتہ نہیں ہوگا۔ انہیں رہائش، ٹرانسپورٹ اور خوراک معیاری سطح کی فراہم کی جائیں گی۔
انیق احمد نے بتایا کہ گزشتہ برس حج 11لاکھ75ہزار روپے میں ہوا تھا، ڈالر اور ریال کی قیمت بڑھنے کے باوجود حجاج سے گزشتہ برس سے بھی کم رقم وصول کی جائے گی، آئندہ دو سے تین دن میں وفاقی کابینہ کی منظوری کے بعد حج پالیسی کا اعلان کردیا جائے گا، حج کے پانچ دن منیٰ میں قیام کے حوالے سے بھی بہت اچھی جگہ کا انتخاب کیا گیا ہے۔
نگراں وزیر برائے مذہبی امور انیق احمد نے بتایا کہ پاکستان سے بھی جو افراد ڈالر میں ادائیگی کریں گے وہ بغیر قرعہ اندازی کے حج پر جاسکیں گے۔
انہوں نے کہا کہ پاکستان کو ڈالرز کی شدید ضرورت ہے، اس اسکیم سے فائدہ اٹھاکر اوورسیز پاکستانی نہ صرف ملک کی خوشحالی کا سبب بنیں گے بلکہ بچت بھی کرسکیں گے، وفاقی وزیر کا کہنا تھا کہ روڈ ٹو مکہ اسکیم کے تحت حج پر جانے والوں کی سعودی امیگریشن کا عمل بھی پاکستان میں ہی مکمل کرلیا جاتا ہے، آئندہ حج کے موقع پر اسلام آباد کے بعد کراچی میں بھی یہ سہولت کراچی میں بھی دی جائےگی۔ ہماری درخواست پر لاہور کو بھی اسکیم میں شامل کرنے کیلئے سعودی عرب غور کررہا ہے۔
ایک سوال کے جواب میں انہوں نے بتایا کہ حجاج کیلئے ایک ایپ متعارف کرائی جارہی ہے جس کے تحت ہم حاجی سے اور وہ ہم سے رابطہ کرسکے گا اور یہ ایپ بغیر انٹر نیٹ کے بھی چلے گی، اس کے علاوہ سعودی عرب جانے والے افراد کا واٹس ایپ کام نہیں کرتا تو حجاج کو ایک سم پیکیج بھی آفر کیاجائے گا جوکہ صرف50ریال یعنی پاکستانی روپیہ میں4ہزار روپیہ ہوگی جس کے تحت45دن تک حجاج انٹر نیٹ کی سہولت کے ساتھ لامحدود کالز کرسکیں گے۔
انہوں نے کہا کہ حجاج کیلئے مزید سہولتوں کا اعلان بھی وقت آنے پر کیا جائے گا۔
تقریب کے میزبان قمر رضا سید نے کہا کہ حکومت پاکستان کی طرف سے حجاج کیلئے اس سہولت کا اوورسیز پاکستانیوں کو بھرپور فائدہ اٹھانا چاہیے کیونکہ یہ پاکستان کی بھی بہت بڑی خدمت ہوگی ، ثواب کے ساتھ اوورسیزپاکستانی اپنے وطن کی اس مشکل گھڑی میں مدد بھی کرسکیں گے۔
برینٹ کونسل کے ڈپٹی میئر کونسلر طارق ڈار نے کہا کہ اس اسکیم سے اوورسیز پاکستانی بڑی بچت کرسکیں گے اور انہیں چاہیے کہ وہ پاکستان میں اپنے عزیزواقارب کو بھی اس اسکیم کے تحت حج پر بھیجیں۔ تقریب میں کمیونٹی کے نمائندہ افراد شریک تھے۔
