جہلم: محکمہ وائلڈ لائف نے غیر قانونی شکار کرنے والے 18 شکاریوں کو گرفتار کر لیا، 5 لاکھ 49 ہزار 5 سو روپے جرمانہ عائد، شکاری نایاب نسل کے ہرن اور ہڑیال سمیت قیمتی پرندوں کا بھی شکار کر رہے تھے۔
تفصیلات کے مطابق سردی کی آمد کے ساتھ ہی ضلع جہلم بالخصوص سوہاوہ اور گردونواح میں نایاب نسل کے ہرن اور اڑیال کے ساتھ ساتھ جنگلی خرگوش اور پرندوں کا غیر قانونی شکار شروع ہو جاتا ہے جس کی روک تھام کے لیے محکمہ وائلڈ لائف کی کارروائیاں جاری ہیں۔
گزشتہ 10 روز میں محکمہ وائلڈ لائف نے 18 غیر قانونی شکار کرنے والے شکاریوں کو پکڑا اور 5 لاکھ 49 ہزار 5 سو روپے جرمانہ عائد کیا۔
اس حوالے سے ضلعی آفیسر محکمہ وائلڈ لائف محمد عثمان الحسن کا کہنا تھا کہ غیر قانونی شکار کے خلاف کریک ڈاؤن جاری رہے گا۔
