اسلام آباد ہائیکورٹ نے سابق پی ٹی آئی رہنما فواد چوہدری کے خلاف توہین الیکشن کمیشن کیس میں الیکشن کمیشن کو حتمی فیصلہ کرنے سے روک دیا، اور نوٹس جاری کرکے جواب طلب کرلیا۔
اسلام آباد ہائیکورٹ میں سابق پی ٹی آئی رہنما فواد چوہدری کی توہین الیکشن کمیشن کیس کے خلاف انٹرا کورٹ اپیل پر سماعت ہوئی، کیس کی سماعت جسٹس گل حسن اورنگزیب اورجسٹس ثمن رفعت امتیاز نے کی۔
درخواست گزار کے وکیل فیصل چوہدری نے عدالت میں موقف پیش کیا کہ ایک وقت میں کسی ملزم کے خلاف دو فورمز پرکارروائی نہیں کرسکتے، یہ سائل کے بنیادی حقوق کی خلاف ورزی ہے۔
فواد چوہدری کی وکالت کرنے والے ان کے بھائی ایڈووکیٹ فیصل چوہدری نے مزید کہا کہ اگر اس کی اجازت دی جائے تو حکومت مخالفین کو ایسے مقدمات میں الجھائے رکھے گی۔
وکیل کے مطابق درخوست گزار کے خلاف سیاسی بنیادوں پر مقدمات بنائے گئے، سنگل بینچ نے سماعت میں اہم ترین نقاط کو مدنظر نہیں رکھا۔
عدالت نے کیس میں الیکشن کمیشن کو حتمی فیصلہ کرنے سے روک دیا، اور الیکشن کمیشن کو نوٹس جاری کرکے جواب طلب کر لیا۔
