جہلم: ڈسٹرکٹ پولیس آفس جہلم میں ڈی پی او جہلم ناصر محمود باجوہ کی زیر قیادت ایس پی انویسٹی گیشن جہلم،ڈی ایس پی لیگل اور پراسیکیوشن افسران سے میٹنگ کا انعقاد کیا گیا۔
میٹنگ میں ایس پی انویسٹی گیشن جہلم محمد حسیب راجہ، ڈی ایس پی لیگل غلام عباس شاہ، ڈسٹرکٹ پبلک پراسیکیورٹر چوہدری ظفر اقبال، ڈپٹی ڈسٹرکٹ پبلک پراسکیورٹرز خالد محمود ساہی، غلام محی الدین رانجھا ، اسسٹنٹ ڈسٹرکٹ پبلک پراسیکیورٹر امجد جاوید للِہ اور اسسٹنٹ ڈسٹرکٹ پبلک پراسیکیورٹر/ پبلک ریلیشن آفیسر پراسیکیوشن جہلم ،ظہیر احمد اوپل نے شرکت کی۔
میٹنگ میں ضلع جہلم کے زیر تفتیش مقدمات کی جلد یکسوئی، رپورٹ ہائے 173 ض ف کی عدالت ہائے میں بروقت ترسیل، پینڈنگ چالان و پینڈنگ روڈ سرٹیفکیٹس کے حوالے سے معاملات زیر بحث آئے۔
ڈی پی او جہلم ناصر محمود باجوہ نے کہا کہ تفتیشی افسران کی استعداد کار بڑھانے کے لیے پراسیکیوشن افسران اپنا کردار ادا کریں۔ پراسیکیوشن افسران، تفتیش میں پائے جانے والےسقم دور کر کے تفتیشی افسران کی راہنمائی اور مقدمات کی درست پیروی کرتے ہوئے ملزمان کو قرار واقعی سزا دلوانے میں اپنا کردار ادا کریں.
انہوں نے کہا کہ درست پراسیکیوشن، تفتیشی افسران کی مبنی بر حقیقت تفتیش اور ٹھوس شواہد کی بنیاد پر ہی ملزمان کو کیفر کردار تک پہنچایا جا سکتا ہے۔
