جہلم: وزیراعلیٰ پنجاب مریم نواز کی ہدایت پر جہلم سمیت صوبے بھر میں ٹرانسپورٹ کرایوں میں کمی کیلئے گرینڈ آپریشن شروع ہو گیا ہے۔ ڈپٹی کمشنرز کی قیادت میں پورے پنجاب کی انتظامیہ سڑکوں پر نکل آئی ہے۔
جہلم، خانیوال، ملتان، ساہیوال، گوجرانولہ، سیالکوٹ، منڈی بہاؤالدین سمیت مختلف اضلاع میں ڈپٹی کمشنرز اور ضلعی انتظامیہ کے حکام نے بسوں میں جانچ پڑتال شروع کر دی ہے۔
شیخوپورہ کے ڈی سی ڈاکٹر وقار، فیصل آباد کے ڈی سی عبداللہ نیر، ڈی سی راولپنڈی حسن وقار، ڈی سی سرگودھا کیپٹن اورنگزیب اور لیہ کے ڈی سی علی اکبر بھنڈر نے بس اڈوں پر چھاپے مارے۔
ڈی سیز نے ٹرانسپورٹ کرایوں کی جانچ پڑتال کی اور سواریوں سے کرایہ کے بارے میں دریافت کیا۔
واضح رہے کہ وزیر اعلیٰ نے عید کے بعد گھروں سے واپس آنے والے مسافروں سے زائد کرایے کی وصولی روکنے کی ہدایات جاری کی اور ہر ضلع کے ڈسٹرکٹ روڈ ٹرانسپورٹ اتھارٹی کے سربراہ کے طور پر ڈپٹی کمشنرز کو کرایوں میں کمی کو یقینی بنانے کی ہدایت کی۔
