جہلم: دلدار علوی نے کہا کہ جن مشکل حالات میں عوام نے سید رفعت زیدی کو کامیابی دلائی اس کا جواب ایم پی اے بن کر رفعت زیدی نے نہیں دیا، عوام ان کے اس رویے اور کارکردگی سے مایوس ہیں۔
ضلعی صدر مجلس وحدت مسلمین ضلع جہلم دلدار علوی نے میڈیا سے گفتگو کرتے ہوئے کہا کہ ہمارا حلقہ پہلے ہی پسماندہ ہے، یہاں پانی کے مسائل ہیں، صحت کے مسائل ہیں، یہاں تعلیم کے مسائل ہیں، اس کے علاوہ یہاں لوگوں کو ہر وقت اپنے نمائندے کی ضرورت ہوتی ہے لیکن رفعت زیدی جب سے ایم پی اے بنے ہیں انہوں نے لوگوں سے رابطہ چھوڑ دیا ہے ۔
انہوں نے کہا کہ علاقے کے مسائل و مشکلات کے باوجود رفعت زیدی نے حلقہ میں آنا جانا چھوڑ دیا ہے۔ بس اپنے دربار تک محدود ہو گئے ہیں جس کا عوام کو شدید دکھ ہے، جو اکثر مختلف جگہوں پر اس کا اظہار کرتے ہوئے نظر آتے ہیں۔ اب بھی وقت ہے اگر انہوں نے دوبارہ پی پی 24 سے منتخب ہونا ہے تو علاقے کی پسماندگی اور اس علاقے کے مسائل کی طرف توجہ دیں۔
دلدار علی نے مزید بات کرتے ہوئے کہا کہ ایم ڈبلیو ایم ضلع جہلم نے الیکشن کے دوران ان کی ہر جگہ میٹنگ کروائی، مکمل سپورٹ کیا مگر لوگوں کی مایوسی دیکھ کر لگتا ہے کہ رفعت زیدی سب بھول گئے ہیں اوران کو بھی ماضی کے اقتدار کے مزے لوٹنے والوں کی طرح فقط ایم پی اے کا چسکا پڑ گیا ہے۔ اگر یہی صورتحال رہی تو مستقبل میں عوام کسی متبادل امیدوار کی طرف رجوع کرے گی۔
