دینہ: ڈپٹی کمشنر جہلم میثم عباس نے گزشتہ روز دینہ کا خصوصی دورہ کیا، جہاں انہوں نے شہر میں جاری ترقیاتی اور خوبصورتی کے منصوبوں کا معائنہ کیا۔
دورے کے دوران انہوں نے مین چوک، ریلوے روڈ پر نصب تاریخی شخصیت شیر شاہ سوری کے گھڑ سوار مجسمے کا وزٹ کیا۔ یہ مجسمہ دینہ شہر کی خوبصورتی میں نمایاں اہمیت رکھتا ہے اور شہریوں کی توجہ کا مرکز بنا ہوا ہے۔
ڈپٹی کمشنر نے مجسمے کے ڈیزائن اور موجودہ حالت کا باریک بینی سے جائزہ لیا اور متعلقہ حکام کو ہدایت کی کہ اس کو مزید بہتر اور دیدہ زیب بنانے کے لیے فوری اقدامات کیے جائیں۔ انہوں نے اس بات پر زور دیا کہ مجسمہ نہ صرف تاریخی اہمیت کا حامل ہے بلکہ یہ علاقے کی ثقافتی شناخت کی عکاسی بھی کرتا ہے، اس لیے اس کی خوبصورتی میں کوئی کسر نہ چھوڑی جائے۔
اس موقع پر اسسٹنٹ کمشنر دینہ سعدیہ حسین ڈوگر، تحصیلدار دینہ شمشیر حیدر رانجھا، اور چیف آفیسر میونسپل کمیٹی دینہ گلشن نورین ان کے ہمراہ موجود تھے۔ ان کے علاوہ میونسپل کمیٹی کے دیگر افسران اور عملہ بھی موجود تھا، جنہوں نے ڈپٹی کمشنر کو شہر میں جاری مختلف ترقیاتی منصوبوں کے حوالے سے بریفنگ دی۔
ڈپٹی کمشنر نے متعلقہ حکام کو ہدایت دی کہ شہر کی خوبصورتی میں اضافے کے لیے تمام ضروری اقدامات بروقت مکمل کیے جائیں۔ انہوں نے اس بات پر بھی زور دیا کہ عوامی مقامات کی صفائی، تزئین و آرائش اور دیکھ بھال کو یقینی بنایا جائے تاکہ شہریوں کو ایک صاف ستھرا اور خوبصورت ماحول فراہم کیا جا سکے۔
