جہلم: ڈپٹی کمشنر سید محمد میثم عباس نے راولپنڈی ویسٹ مینجمنٹ کمپنی کے عملے کی کارکردگی، صفائی ستھرائی اور تجاوزات کے خلاف جاری آپریشن کا تفصیلی جائزہ لیا۔ انہوں نے شہر، ملحقہ آبادیوں اور دیہاتوں میں روزانہ کی بنیاد پر صفائی کے بہتر انتظامات یقینی بنانے کی ہدایات جاری کیں۔
اس موقع پر ڈپٹی کمشنر میثم عباس نے گفتگو کرتے ہوئے کہا کہ وزیر اعلیٰ پنجاب مریم نواز شریف کی ہدایت پر ضلع بھر میں صفائی ستھرائی کے خصوصی اقدامات پر مکمل عمل درآمد کو یقینی بنایا جائے گا۔ ضلع کے تمام شہر، قصبے اور دیہات صاف ستھرے نظر آنے چاہئیں۔ صفائی کے عمل میں کسی قسم کی کوتاہی یا غفلت برداشت نہیں کی جائے گی۔
ڈپٹی کمشنر نے ہدایت کی کہ راولپنڈی ویسٹ مینجمنٹ کمپنی کا عملہ روزانہ کی بنیاد پر کوڑے کے ڈھیروں کو مقررہ ڈمپنگ سائٹس تک منتقل کرے۔ اس کے ساتھ ساتھ اسسٹنٹ کمشنرز، چیف آفیسرز اور میونسپل کمیٹی کے افسران کو روزانہ فیلڈ میں جا کر صفائی کی صورتحال چیک کرنے کی ہدایت دی گئی۔
انہوں نے مزید کہا کہ تمام متعلقہ افسران مل کر ایسی حکمت عملی اختیار کریں جس سے نہ صرف شہر بلکہ اس سے ملحقہ علاقے بھی صاف ستھرے اور مثالی نظر آئیں۔
