سوہاوہ: محکمہ لائیوسٹاک جہلم کی جانب سے موسم بہار کی شجرکاری مہم کا باقاعدہ آغاز کر دیا گیا ہے۔
یہ مہم سیکرٹری لائیوسٹاک و ڈیری ڈویلپمنٹ پنجاب کی ہدایات پر عملدرآمد کرتے ہوئے پنجاب بھر میں جاری ہے، جس کے تحت ضلع جہلم میں بھی بڑے پیمانے پر پودے لگائے جا رہے ہیں۔
اس موقع پر ایڈیشنل ڈائریکٹر لائیوسٹاک جہلم ڈاکٹر ضیاءاللہ گوندل نے گفتگو کرتے ہوئے کہا کہ درخت ہمارے ماحول کو صاف رکھنے میں کلیدی کردار ادا کرتے ہیں اور پاکستان جیسے ممالک میں سموگ اور فضائی آلودگی جیسے مسائل سے نمٹنے کے لیے شجرکاری انتہائی ضروری ہے۔
انہوں نے مزید بتایا کہ محکمہ لائیوسٹاک کے زیرانتظام ضلع کی چاروں تحصیلوں میں موجود ویٹرنری ہسپتالوں میں شجرکاری کی جا رہی ہے جس میں سایہ دار، پھل دار اور آرائشی پودے شامل ہیں۔ محکمہ لائیوسٹاک کے اس اقدام کا مقصد نہ صرف ماحولیاتی بہتری ہے بلکہ عوام میں شجرکاری کے فروغ کے لیے آگاہی بھی پیدا کرنا ہے۔
