جہلم: بھارتی جارحیت اور بے گناہ پاکستانی شہریوں کو شہید کرنے کے خلاف جہلم پریس کلب کے زیراہتمام ایک مذمتی اجلاس چیئرمین چوہدری عابد محمود کی زیر صدارت منعقد ہوا۔
اجلاس میں جہلم پریس کلب کے عہدیداران اور ممبران کی بڑی تعداد نے شرکت کی۔ اجلاس کا آغاز تلاوتِ کلامِ پاک سے ہوا جس کی سعادت سینئر صحافی مرزا قدیر بیگ نے حاصل کی، جبکہ نعت رسول مقبول ﷺ سید ناصر محمود نے پیش کی۔
اجلاس سے خطاب کرتے ہوئے چیئرمین چوہدری عابد محمود نے کہا کہ پاکستان کے خلاف بھارتی جارحیت ناقابل برداشت ہے، ہم اس کی شدید مذمت کرتے ہیں۔ انہوں نے پاکستانی مسلح افواج کی جانب سے بزدل بھارتی فوج کو دی جانے والی منہ توڑ جوابی کارروائیوں کو خراجِ تحسین پیش کیا۔
انہوں نے واضح کیا کہ جہلم پریس کلب کے تمام عہدیداران اور ممبران پاک فوج کے شانہ بشانہ کھڑے ہیں، اور ضلع بھر کے صحافی اور عوام ملک کی سالمیت کے دفاع کیلئے ہر قربانی دینے کو تیار ہیں۔
اجلاس کے اختتام پر بھارتی جارحیت کے نتیجے میں شہید ہونے والے پاکستانی شہریوں کیلئے دعائے مغفرت کی گئی۔
اجلاس میں سرپرست جہلم پریس کلب راجہ جہانزیب خان، جنرل سیکرٹری الیاس صادق وٹو، نائب صدر مرزا قدیر بیگ، چوہدری ظفر نور، سہیل کیانی، سید ناصر محمود، سید اکرم حسین بخاری، ڈاکٹر اعجاز اعوان، ملک فدا حسین، سید مستفیض اقبال بخاری، یاسر فہمید، الیکٹرانک میڈیا کے صدر عامر کیانی، عبدالباسط مجاہد، غلام قادر مخلص، وسیم قریشی، شہریار علی راجہ، چوہدری سالک حسین، شیخ ذوالفقار علی، چوہدری تصور حسین، مرزا فاران بیگ، عبدالرحمٰن قادری، چوہدری دانیال عابد، عبدالغفار اسماعیل احمد، بلال احمد، صائمہ سحر، محمد اشرف جنجوعہ، انیس الرحمن بٹ، فضل خان، مفتی شیر خان اور دیگر صحافی حضرات نے شرکت کی۔
