پنڈ دادنخان میں شہری کے قتل کے مقدمہ کا فیصلہ سنا دیا گیا۔ عدالت نے جرم ثابت ہونے پر مجرم عدنان شہزاد کو سزائے موت اور جرمانے کی سزا سنا دی۔
تفصیلات کے مطابق عدالت نے قتل کے مقدمہ نمبر 302/17 بجرم 302/109 تھانہ پنڈ دادنخان میں فیصلہ سناتے ہوئے مجرم کو قرار واقعی سزا سنائی۔
مجرم عدنان شہزاد کو سال 2017 میں شہری کو قتل کرنے کے جرم میں گرفتار کیا گیا تھا۔ جہلم پولیس نے جدید سائنسی خطوط پر تفتیش کرتے ہوئے مقدمہ کو ٹریس کیا، ملزم کو گرفتار کیا اور ٹھوس شواہد کے ساتھ چالان عدالت میں پیش کیا۔
مقدمہ کی مؤثر پیروی کے نتیجے میں عدالت نے جرم ثابت ہونے پر مجرم کو سزائے موت اور 10 لاکھ روپے جرمانے کی سزا سنائی۔
ڈسٹرکٹ پولیس آفیسر جہلم طارق عزیز سندھو نے کہا کہ سنگین نوعیت کے مقدمات میں ملوث ملزمان کسی رعایت کے مستحق نہیں۔ پولیس نے انصاف کے تقاضے پورے کرتے ہوئے متاثرہ خاندان کو انصاف دلانے میں اہم کردار ادا کیا ہے۔
ڈی پی او جہلم نے کیس کی کامیاب تفتیش اور مؤثر قانونی پیروی پر انوسٹیگیشن اور لیگل ٹیموں کو شاباش دیتے ہوئے تعریفی اسناد اور نقد انعام دینے کا اعلان بھی کیا۔
