جہلم/ پنڈدادنخان: شادی کے اسرار کرنے پر کھیوڑہ کی پہاڑیوں میں بیوہ خاتون کو فائرنگ کر کے قتل کرنے والے ملزم کو پولیس نے چکوال سے گرفتار کر لیا۔ ملزم نے اقبال جرم کر لیا۔
تفصیلات کے مطابق جہلم کی تحصیل پنڈدادنخان میں کھیوڑہ کی پہاڑیوں میں بیوہ خاتون کو فائرنگ کرکے قتل کرنے کے افسوسناک واقعہ میں پولیس نے کارروائی کرتے ہوئے مبینہ مرکزی ملزم حماد کو ضلع چکوال سے گرفتار کر لیا۔
پولیس کے مطابق ملزم نے مبینہ طور پر اپنے ساتھی کے ہمراہ خاتون کو اس وقت فائرنگ کا نشانہ بنایا جب وہ اپنے دو بچوں کے ساتھ موجود تھیں۔ مقتولہ کے بھائی کی مدعیت میں مقدمہ درج کر کے واقعہ کی مزید تفتیش جاری ہے۔
پولیس کے مطابق 18 ستمبر کو ملزم حماد خاتون اور ان کے دونوں بچوں کو سیر کروانے کے بہانے کھیوڑہ لے کر گیا، جہاں کھیوڑہ کی پہاڑیوں میں مبینہ طور پر ملزم نے اپنے ایک ساتھی کے ہمراہ خاتون پر فائرنگ کر دی۔ فائرنگ کے نتیجے میں خاتون شدید زخمی ہو گئیں اور بعد ازاں زخموں کی تاب نہ لاتے ہوئے جاں بحق ہو گئیں۔
پولیس کے مطابق مقتولہ کی شناخت عظمت شاہین کے نام سے ہوئی ہے جبکہ مقتولہ اور مبینہ ملزم دونوں کا تعلق ضلع چکوال سے بتایا جاتا ہے۔ پولیس کا کہنا ہے کہ فائرنگ کا واقعہ دونوں بچوں کے سامنے پیش آیا، جس کے بعد ملزمان گاڑی سمیت موقع سے فرار ہونے میں کامیاب ہو گئے تھے۔
پولیس کا مزید کہنا ہے کہ ملزم حماد شادی کا جھانسہ دے کر خاتون کو مبینہ طور پر زیادتی کا نشانہ بھی بناتا رہا جبکہ خاتون کی جانب سے شادی پر اصرار کرنے پر مبینہ طور پر یہ انتہائی اقدام کیا گیا۔
واقعے کی اطلاع ملنے کے بعد ایس ایچ او تھانہ پنڈدادنخان ملک نثار احمد کی قیادت میں پولیس ٹیم نے جدید سائنٹیفک اور تکنیکی بنیادوں پر تفتیش آگے بڑھاتے ہوئے مبینہ ملزم کا سراغ لگایا اور اسے ضلع چکوال سے گرفتار کر لیا۔
پولیس کے مطابق کارروائی کے دوران ملزم کے قبضے سے مبینہ طور پر واردات میں استعمال ہونے والا اسلحہ بھی برآمد کر لیا گیا ہے، جسے تحویل میں لے کر ملزم کو تھانے منتقل کر دیا گیا۔ گرفتار ملزم حماد نے دوران تفتیش مبینہ طور پر اقبال جرم کیا ہے، تاہم واقعے کے دیگر پہلوؤں، ساتھی ملزم اور واردات کے محرکات کے حوالے سے مزید تفتیش جاری ہے۔
پولیس کے مطابق مقتولہ کے بھائی کی مدعیت میں مقدمہ درج کر لیا گیا ہے اور واقعے میں ملوث دیگر ملزمان کی گرفتاری اور شواہد اکٹھے کرنے کے لیے بھی کارروائی جاری ہے۔
