جہلم شہر کے گنجان آباد علاقے محلہ اسلام پورہ ، کریم پورہ، بلال ٹاؤن،کالا گجراں ، مجاہد آباد، شمالی محلہ، جادہ اپنے ناموں کی طرح شاداب نہ ہو سکے۔ گندا پانی سڑکوں پر ، لٹکتی بجلی کی تاریں ، ٹوٹی پھوٹی گلیاں ،ناکارہ سڑکیں مکینوں کی زندگیاں اجیرن ہوکر رہ گئیں۔ مکین شدیدزہنی و جسمانی کوفت میں مبتلا ، سہولیات کی عدم دستیابی کیوجہ سے شہری نقل مکانی کرنے پر مجبور ہیں۔
جہلم شہر کے گنجان آباد علاقوں جن میں محلہ کریم پورہ، بلال ٹاؤن،کالا گجراں، مجاہد آباد، اسلام پورہ ، شمالی محلہ، جادہ ، روہتاس روڈ کے مکینوں نے صحافیوں سے گفتگو کرتے ہوئے بتایا کہ شہر کے گنجان آباد علاقوں کی سٹرکیں، گلیاں پچھلے کئی سالوں سے ٹوٹ پھوٹ کا شکارہونے کے ساتھ ساتھ بنیادی سہولیات جن میں سوئی گیس، پانی، سیوریج کی سہولت نہ ہونا شامل ہے ، جس کیوجہ سے علاقہ مکین زہنی تناؤ کا شکار ہو چکے ہیں. گلیاں، محلے صفائی ستھرائی نہ ہونے کے باعث بیماریوں میں گھر چکے ہیں۔
علاقہ مکینوں کا کہنا ہے کہ گلیوں کی ٹوٹ پھوٹ کے باعث گھروں سے نکلنے والا گندا پانی گلیوں اور خالی پلاٹوں میں کھڑا ہو جاتا ہے جس کی وجہ سے مچھروں کی افزائش میں غیر معمولی اضافہ ہو رہاہے، یہ گندا پانی نہ صرف گلی محلوں میں پھیل رہا ہے بلکہ علاقہ مکینوں کے مکانوں کی بنیادوں میں دھنس کر گھروں کی دیواریں کمزور کرنے کا سبب بن رہا ہے۔
علاقہ مکینوں کا کہنا ہے کہ محلوں کی مسجدوں کے پاس بھی گندا پانی جمع رہتا ہے جس کی وجہ سے نمازیوں کو پانچ وقت نماز کی ادائیگی میں شدید دشواری کا سامنا کرنا پڑتا ہے۔ان علاقوں کی متعدد گلیاں برائے نام پختہ ہیں، سیوریج کی لائنیں ناقص حکمت عملی کے باعث بند ہونے سے سیوریج کا پانی بھی گلی محلوں میں جمع رہتاہے۔
دوسری جانب بارشوں کے موسم میں شہریوں کو آمدورفت میں شدید مشکلات کا سامنا کرنا پڑتا ہے۔
شہریوں نے ارباب اختیار سمیت ضلعی انتظامیہ سے مطالبہ کیا ہے کہ اندرون شہر کے گلی محلوں کی سڑکوں ،گلیوں کو پختہ کرنے سوئی گیس سمیت سیوریج کی لائنیں بچھانے کے لئے فنڈز جاری کئے جائیں تاکہ آج کے ترقی یافتہ دور میں علاقہ مکین بنیادی سہولیات سے مستفید ہو سکیں۔
