برمنگھم: نبی اکرم ﷺ سے محبت ایما ن کا جزوِ لازم ہے۔مسلم امہ کو اتحاد و اتفاق سے ہمکنار کرنے کیلئے حضور ﷺ کی تعلیما ت پرلازمی طور عمل کرنا ہو گا مسلمان اگر اپنا کھویا ہوا وقار دوبارہ حاصل کرنا چاہتے ہیں تو انہیں اپنی محبتوں اور چاہتوں کامرکز و محور رسالتِ مآب ﷺکو بنانا ہوگا۔
ان خیالات کا اظہار تحریکِ کشمیر بر طا نیہ کے نائب صدر مفتی عبدالمجید ندیم نے ہینڈز ورتھ اسلامک سنٹر برمنگھم میں ہفتہ وار پروگرام سے خطاب کرتے ہو ئے کیا۔
انہوں نے کہا ’’ صحابہ کرامؓ اور اہلِ بیتؓ نے جو ں ہی نبی اکرم ﷺ سے محبت کا دعویٰ کیا انہیں آزمائشوں کی بھٹی سے گذرنا پڑا ،وہ حضور ﷺ کے ایسے جا نثار تھے جنہوں نے غلبہ حق کی جدوجہد میں قدم قدم پر نبی اکرم ﷺ کا ساتھ دیا ،ان کی ایک بڑی تعداد نے حضور ﷺ کے قدموں میں جا ن دے کر فدویت ، جان نثاری اور جان سپاری کی عظیم تاریخ رقم کی جس کی روشنی سے قافلہ حق ہمیشہ فیضیاب ہوتا رہے گا ۔
مفتی عبدا لمجید ندیم نے کہا کہ ’’ضرورت اس امر کی ہے کہ محبتِ رسول ﷺکے ساتھ ساتھ اتباعِ رسولﷺ کے پیغام کو بھی عام کیا جا ئے، آج سیرتِ طیبہﷺ کے جلوس ، جلسے اور پروگرامزظاہری شان و شوکت کا ذریعہ تو بنتے جا رہے ہیں لیکن ان میں اطاعت رسول پر بہت کم زور دیا جا رہا ہے ،یہی وجہ ہے کہ مسلما نوں کی اکثریت سنت رسولﷺ سے دور ہو تی جا رہی ہے۔
انہوں نے علما و مشائخ سے بھی اپیل کی کہ وہ ایسے تمام پروگرواموں میں محبتِ رسولﷺ کے ساتھ ساتھ اتباعِ رسولﷺ کی ترغیب دیں تا کہ نبی اکرم ﷺ سے سچی محبت رکھنے والے افراد کے اندر عمل کا جذبہ بھی پیدا ہو۔
