ویسے تو پاکستان میں گزشتہ کچھ مہینوں سے گاڑیوں کی قیمتوں میں کچھ کمی دیکھی جا رہی تھی، لیکن بالخصوص پچھلے چند ہفتوں میں پاکستان میں گاڑیوں کی بڑی کمپنیوں کیا، پیجو، سوزوکی، چنگان اور چیری کی جانب سے قیمتوں میں بڑی کمی کا اعلان کیا گیا جس سے صارفین نے فائدہ بھی اٹھایا اور وہ دیگر کمپنیوں سے بھی اسی طرح کے اعلان کی توقع کررہے تھے۔
جہاں گاڑیوں کی قیمتوں میں کمی دیکھنے میں آئی، وہیں ہنڈا کے بارے میں بھی سوشل میڈیا اور دیگر پلیٹ فارمز پر ایک خبر گردش کرتی رہی کہ ہنڈا کہ جانب سے بھی گاڑیوں کی قیمتوں میں کمی کردی گئی ہے۔
اس خبر کی تحقیق کرنے کے لیے ہنڈا کمپنی کے سینیئر سیل مینیجر سے بات کی تو انہوں نے اس حوالے سے بتایا کہ سوشل میڈیا پر جو ایک نوٹیفیکیشن گردش کر رہا ہے وہ فیک ہے، اور کمپنی کی جانب سے قیمتوں میں کمی سے متعلق کوئی فیصلہ نہیں کیا گیا ہے۔
ایک سوال کے جواب میں ان کا کہنا تھا کہ فی الحال ہنڈا کا آئندہ کچھ عرصے میں گاڑیوں کی قیمت کم کرنے سے متعلق کوئی منصوبہ بھی نہیں ہے۔
انہوں نے کہا کہ ہماری جانب سے پہلے ہی جتنا ممکن ہوسکتا تھا، کمی کی جاچکی ہے اور اب قیمتوں میں مزید کمی ممکن نہیں ہے۔
