جہلم شہر کے بازاروں، گلیوں، چوک اور چوراہوں میں بجلی، فائبر آپٹک، کیبلز اور پی ٹی سی ایل کی لٹکتی تاریں شہریوں کے لئے خطرہ بن گئیں، متعدد موٹر سائیکل سوار مذکورہ تاروں سے الجھ کر زخمی ہونے کی اطلاعات، شہریوں نے کھمبوں سے لٹکتی تاروں کو ختم کروانے کا مطالبہ کردیا۔
تفصیلات کے مطابق جہلم شہر سمیت ملحقہ علاقوں میں بجلی ، ٹیلیفون ، انٹر نیٹ، ٹی وی کیبل کی تاریں جو ٹوٹ پھوٹ کا شکار ہو کرلٹک رہی ہیں جن سے اکثر و بیشتر موٹر سائیکل سوار الجھ کر زخمی ہو جاتے ہیں۔
شہریوں کا اس حوالے سے کہنا ہے کہ بجلی ، فائبر آپٹک ،ٹی وی کیبلز، پی ٹی سی ایل کی تاریں اس وقت شہر سمیت مضافاتی علاقوں میں اس طرح پھیلی ہوئی ہیں جیسے ان محکموں کا کوئی والی وارث موجود نہیں ۔ جگہ جگہ ٹوٹی تاروں کیوجہ سے شہریوں کی زندگیوں کو خطرات لاحق ہیں۔
شہریوں نے سرکاری محکموں، ٹی وی کیبلز اور فائبر آپٹک نیٹ ورکس مالکان سے مطالبہ کیاہے کہ اپنے اپنے محکموں کی لٹکتی لاوارث تاروں کو اونچائی پر باندھا جائے تاکہ حادثات میں کمی واقع ہو سکے۔
شہری تنظیموں کے عمائدین کا کہنا ہے کہ سرکاری و نجی اداروں نے سنجیدگی کا مظاہرہ نہ کیا تو عدالت کا دروازہ کھٹکھٹانے پر مجبور ہونگے جس کے تمام تر اخراجات متعلقہ محکموں کے ذمہ داران ادا کرنے کے پابند ہونگے اور اگر کوئی حادثہ پیش آیا اور حادثے کی صورت میں کسی قسم کا کوئی جانی یا مالی نقصان ہوا تو متعلقہ محکموں کے خلاف مقدمہ درج کروایا جائے گا۔
