پنڈدادنخان پولیس نے منشیات اور شراب فروش عناصر کے خلاف دو الگ الگ کارروائیوں میں ایک بھنگ فروش اور دو مبینہ شراب سپلائرز کو گرفتار کر کے بھاری مقدار میں بھنگ، شراب اور واردات میں استعمال ہونے والا رکشہ برآمد کر لیا۔
ترجمان جہلم پولیس کے مطابق جہلم کی تحصیل پنڈدادنخان میں ایس ایچ او تھانہ پنڈدادنخان کی زیرِ نگرانی انچارج چوکی کھیوڑہ اور پولیس ٹیم نے کارروائی کرتے ہوئے ایک ملزم کو گرفتار کیا، جو مبینہ طور پر کھیوڑہ میں 200 روپے فی پیالہ کے حساب سے بھنگ فروخت کرتا تھا۔ پولیس نے ملزم کے قبضے سے 15 کلوگرام سے زائد بھنگ برآمد کر کے قبضے میں لے لی۔
پولیس کے مطابق ابتدائی تفتیش میں معلوم ہوا کہ ملزم نشیلی بھنگ تیار کر کے فروخت کرتا تھا۔ اس کے خلاف تھانہ پنڈدادنخان میں مقدمہ درج کر کے مزید تفتیش شروع کر دی گئی ہے۔
ایک اور کارروائی میں تھانہ پنڈدادنخان پولیس نے شراب کی سپلائی کی کوشش ناکام بناتے ہوئے دو مبینہ شراب سپلائرز کو گرفتار کر لیا۔ ترجمان کے مطابق ملزمان رکشے پر بڑی مقدار میں شراب لے کر کھیوڑہ کے علاقے میں فروخت کی غرض سے جا رہے تھے، تاہم پولیس نے بروقت کارروائی کرتے ہوئے انہیں حراست میں لے لیا۔
پولیس کے مطابق ملزمان کے قبضے سے 50 بوتلیں اور 20 لیٹر دیسی شراب برآمد کی گئی، جبکہ شراب کی ترسیل میں استعمال ہونے والا رکشہ بھی قبضے میں لے لیا گیا۔ دونوں ملزمان کے خلاف الگ الگ مقدمات درج کر کے مزید تفتیش شروع کر دی گئی ہے تاکہ اس غیر قانونی نیٹ ورک سے وابستہ دیگر افراد کو بھی قانون کے کٹہرے میں لایا جا سکے۔
ڈی پی او جہلم شفیق احمد چوہدری نے کہا کہ جہلم پولیس منشیات اور شراب فروش عناصر کے خلاف بلاامتیاز کارروائیاں جاری رکھے ہوئے ہے۔ انہوں نے کہا کہ نوجوان نسل کو منشیات کے ناسور سے محفوظ رکھنے اور معاشرے کے امن و سکون کو برقرار رکھنے کے لیے ایسے جرائم میں ملوث افراد کے خلاف قانون کے مطابق سخت کارروائی آئندہ بھی جاری رکھی جائے گی۔
