دبئی: متحدہ عرب امارات میں ورکرز کے پرمٹ اب صرف 45 سیکنڈ میں کینسل کیے جاسکتے ہیں کیوں کہ پرمٹ منسوخ کرنے کے عمل کو اپ گریڈ کردیا گیا ہے۔
اماراتی میڈیا کے مطابق انسانی وسائل اور امارات کی وزارت (MOHRE) نے اعلان کیا ہے کہ یو اے ای میں کارکن کے ورک پرمٹ کی منسوخی کے عمل کو اپ گریڈ اور ہموار کیا گیا ہے، یہ اقدام متحدہ عرب امارات کے زیرو گورنمنٹ بیوروکریسی پروگرام کا حصہ ہے، ورکر پرمٹ کینسل کرنے کے عمل کی اپ گریڈیشن اس بات کو یقینی بنائے گی کہ صارفین کو پریشانی سے پاک تجربہ فراہم کیا جائے۔
بتایا گیا ہے کہ وزارت نے منسوخی کی تمام اقسام کو ایک مشترکہ پلیٹ فارم میں ضم کر دیا ہے، جس کے تحت ورک پرمٹ کی منسوخی کے لیے درکار دستاویزات کی ضرورت ختم کردی گئی ہے، سسٹم میں خودکار منظوریوں کو فعال کرتے ہوئے ورک پرمٹ منسوخ کرنے کے عمل کی پروسیسنگ کا وقت تین منٹ سے کم کرکے صرف 45 سیکنڈز کر دیا گیا ہے۔
اسی طرح متحدہ عرب امارات نے رہائشی ویزہ اور ورک پرمٹ کی پروسیسنگ کا دورانیہ بھی کم کیا ہے، ورک پرمٹ اور رہائشی ویزوں کے حصول کے لیے ضروری دستاویزات پر کارروائی کا وقت ورک بنڈل پلیٹ فارم کے دوسرے مرحلے کے آغاز کے بعد پورے یو اے ای میں 30 دن سے کم کرکے پانچ دن کر دیا گیا ہے۔
معلوم ہوا ہے کہ اس حوالے سے متعدد سرکاری وزارتوں اور وفاقی حکام نے ایک ایسا پلیٹ فارم شروع کیا ہے جو کاروباری مالکان اور نجی کمپنیوں کے لیے نئے ملازمین کی خدمات حاصل کرنے کے ساتھ ساتھ ان کے موجودہ ملازمین کے لیے ورک پرمٹ کی قبل از وقت تجدید کو بھی آسان بنائے گا، ورک بنڈل پلیٹ فارم کے دوسرے مرحلے کے کامیاب آغاز کے بعد یہ عمل، جس میں پہلے 30 دن لگتے تھے، اب پورے متحدہ عرب امارات میں صرف پانچ دن رہ گئے ہیں۔
بتایا جارہا ہے کہ ورک بنڈل پلیٹ فارم کا پہلا مرحلہ اپریل میں دبئی میں شروع کیا گیا تھا اور اب اسے ساتوں امارات میں نافذ کیا جا رہا ہے، ورک بنڈل کے دوسرے مرحلے میں تقریباً 6 لاکھ کمپنیوں اور 70 لاکھ سے زیادہ کارکنان شامل ہوں گے، ایم او ایچ آر ای نے کہا کہ اس کے تیسرے مرحلے میں گھریلو ملازمین کا احاطہ کیا جائے گا، کمپنیاں اور ملازمین فی الحال اس کی ویب سائٹ (workinuae.ae) پر صرف ورک بنڈل تک رسائی حاصل کر سکتے ہیں ، اس کے لیے جلد ہی ایک موبائل ایپ بھی دستیاب کر دی جائے گی۔
