جہلم شہر اور گردونواح میں ڈرائیورز کی جانب سے لیزر لائٹس کا استعمال شہریوں کے لئے عذاب ،حادثا ت روزانہ کا معمول بن گئے۔
شہری اور دیہی علاقوں میں لیزر لائٹس کے شوقین نوجوانوں نے اپنی کاروں ،موٹر سائیکلوں ،اور رکشوں پر لیزر لائٹس لگواکر رات کے وقت سفر کرنے والے شہریوں کی زندگیوں کو خطرے میں مبتلا کر رکھا ہے ۔رات کے وقت لیزر لائٹس آنکھوں میں پڑنے سے حادثات کی شرح میں بھی خاطر خواہ اضافہ دیکھنے میں آیا ہے ۔
لیزر لائٹس کی روشنی اس قدر زیادہ اور تیز ہوتی ہے کہ سامنے سے آنے والے ڈرائیورز کو کچھ نظر نہیں آتا جس کے باعث حادثات کے امکانات بڑھ جاتے ہیں ۔
اس حوالے سے شہریوں نے بتایا کہ لیزر لائٹس کی شدت اتنی زیادہ ہوتی ہے کہ رات کے وقت ایک بار آنکھوں میں پڑ جائے تو طویل دورانیے تک سامنے سے آنے والے ڈرائیور کی آنکھیں چندھیانے کے باعث نظر آنا بند ہو جاتا ہے اورایسے حالات میں حادثات بھی رونما ہوسکتے ہیں۔
شہری اور عوامی حلقوں نے اس سے قبل بھی متعدد بارمتعلقہ افسران کی توجہ اس اہم مسئلے پر مبذول کروائی ہے لیکن تاحال ٹریفک پولیس، موٹر وے پولیس سمیت قانون نافذ کرنے والے ذمہ داران نے کسی قسم کی کوئی کارروائیاں نہیں کیں ، جس کیوجہ سے ایسے عناصر جو اپنا شوق پوراکرنے کی خاطر شہریوں کی زندگیوں کو خطرے میں ڈالے ہوئے ہیں اور بلا خوف و خطر لیزر لائٹس کا استعمال کرکے شہریوں کے لئے وبال جان بنے ہوئے ہیں۔
شہری، سماجی، رفاعی اور فلاحی تنظیموں کے عمائدین نے ایسے عناصرسمیت لیزر لائٹس فروخت کرنے والے دکانداروں کے خلاف کارروائیاں کرنے کا مطالبہ کیاہے۔
