جہلم: ڈسٹرکٹ ٹریفک آفیسر رضا حسنین اعوان نے ایف جی انٹر کالج جہلم کینٹ میں بریفنگ سیشن کا انعقاد کیا۔
تفصیلات کے مطابق ایڈیشنل آئی جی پنجاب مرزا فاران بیگ کے ویژن اور ڈی پی او جہلم ناصر محمود باجوہ کی زیر نگرانی ڈی ایس پی ٹریفک رضا حسنین اعوان نے فیڈرل گورنمنٹ کالج جہلم کینٹ میں کالج کے بچوں کے لیے ٹریفک قوانین کے بارے میں آگاہی سیشن کا انعقاد کیا۔
اس موقع پر ان کے ہمراہ انچارج ایجوکیشن ونگ کے انسپکٹر ماجد کیانی اور چیئرمین یوتھ اسمبلی فار ہیومن رائٹس ضلع جہلم عبدالغفور چوہان بھی ہمراہ تھے۔ مہمانوں کی آمد پر پرنسپل ادارہ ہذا ملک تیمور، پروفیسر رانا عمران، پروفیسر محمد محسن اور اسٹاف نے ان کا بھرپور استقبال کیا۔
ڈسٹرکٹ ٹریفک آفیسر رضا حسنین اعوان نے بچوں کو ہیلمٹ کی افادیت اور پتنگ بازی، ہوائی فائرنگ سے ہونے والے نقصانات سے آگاہ کیا اور بچوں کو ڈرائیونگ لائسنس اور لرنر بنانے کا مکمل طریقہ بھی سمجھایا۔
ان کا مزید کہنا تھا کہ ٹریفک پولیس انتہائی مناسب فیس میں ڈرائیونگ سکول کے اندر بچیوں کو 15 دن کی ٹریننگ دینے کے بعد لائسنس بنوانے میں بھی ان کی مکمل مدد اور رہنمائی کرتی ہے۔ اس کے علاوہ انہوں نے روڈ پر اپنی اور دوسروں کی جان کی حفاظت کو یقینی بنانے اور ایک دوسرے کے حقوق کا خیال رکھنے اور ٹریفک قوانین پر عمل کرنے کا لیکچر دیا۔
انہوں نے ٹریفک قوانین سے متعلق بچوں کے سوالات کے جوابات بھی دیے۔ آخر میں پرنسپل ملک تیمور احمد نے ڈی ایس پی اور ان کی ٹیم کا شکریہ ادا کیا۔
